Jowai, Lber 21
Haba shimkhia ïa ka jingkyntur pud jong ka Jylla Assam lyngba ka Karbi Anglong Autono-mous Council (KAAC) sha u pud u sam jong ka West Jaiñtia Hills District jong ka Jylla Meghalaya, u Deputy Commissioner ka District, A.K. Singh u la pynlong ïa ka jingjurip da lade ha ka 21 tarik u Lber sha ki thaiñ khappud jong ka shnong Mukroh ha kaba ka KAAC ka la shna be-aiñ ïa ki surok bad ïa ka kper slasha.
Ïa u Deputy Commissioner la synran lang da ka Additional Deputy Commissioner, ka Kong B. Blah, u Additional Superintendent of Police, u Ishan Gupta, u Assistant Commissioner, Bah G.H. Passah, u Waheh Shnong ka Mukroh, u Bah Kitlang Maskut, u MLA barim, Bah Henry Lamin nalor kiwei-kiwei.
La sdang ïa ka jingleit jurip na ki thaiñ Umlaphiah bad Umsalang jong ka shnong Mukroh haba ka KAAC lyngba u kontraktor jong ka, ka la pynjulor ïa ki pynthor jong lai ngut ki nongshong shnong, kita, ka Kong Thal Lamin, ka Kong Bial Nartiang bad ka Kong Kobiang Dkhar ban shna ïa ka surok na bynta ka jaka thung slasha.
Kine ki trai jaka kiba la don lang ha ka jingleit jurip ki la ud la nam ha u Deputy Commissioner halor ka jingleh dusmon jong ka KAAC.
Ha kane ka jingleit jurip sha kitei ki thaiñ, la ïohi ba ka la don ka jingpynjulor dusmon kaba radbah ïa ki lum bad ka jingpom pathar ïa ki dieng ki siej bad jingthang pathar ruh ïa ki dieng.
Hadien kane, ki nongïalam jong ka shnong Mukroh ki la ïalam ïa u A.K. Singh sha ka jaka Mootha Siang Kwai kaba long ka khappud jong ka shnong Mukroh bad ka Block-I ne West Karbi Anglong District, Assam.
Ki nongïalam jong ka shnong Mukroh ki pynkynmaw ha u A.K. Singh halor ka jingdawa jong ki ban buh noh ïa ka Border Outpost jong ki pulit Meghalaya ha Mootha Siang Kwai na bynta ka bha ka miat jong ki nongshong shnong.
Na ka liang jong u A.K. Singh u la kular ba un sa ïakren bad u Deputy Commissioner jong ka West Karbi Anglong District (WKAD) ba ki dei ban pynsangeh noh mardor ki jingtei be-aiñ ha ki thaiñ khappud jong ka Mukroh.
Kum ban shu pynkynmaw, ka Sorkar MDA 1.0 ha ka 29 Naiwieng, 2022 ka la pynbna ïa ka rai ban shna noh ïa ka BOP jong ki pulit Meghalaya ha Mukroh bad Tihwieh jong ka West Jaiñtia Hills District, ha Moorïap, East Jaiñtia Hills, ha Rani, Ri-Bhoi, ha Umwali, Lejadubi bad Langpih West Khasi Hills.
Hynrei wat hadien ka jingshimti biang jong ka Sorkar MDA 2.0, la ar snem tam, ka BOP jong ki pulit Meghalaya kam pat ïeng satia ha Mukroh watla ka Dorbar Shnong Mukroh ka la ïai dawa na ka por sha ka por ban buh noh ïa katei ka BOP ha Mootha Siang Kwai.
