Shillong, Lber 21 (UNI)
U Myntri Rangbah ka Jylla, Conrad K. Sangma u la thoh sha u Myntri Rangbah ka Assam, u Himanta Biswa Sarma ban tyrwa ha ka ban thaw ïa ka ‘Joint Committee’ (bad ka Assam) khnang ban pynduna ïa ka jingjaboh ha ka thaiñ Byrnihat.
Ka Byrnihat, ka shnong kaba don ki karkhana ha khappud ka Assam-Meghalaya, ka la ïoh ïa ka nam kum ka “sor kaba jaboh tam ka lyer ha ka pyrthei”, katkum ka kaiphod ‘World Air Quality’ 2024 jong ka kompani na Switzerland – IQAir.
“Da kaba buh jingmut ïa ki jingsngewkhia ba ïadei bad ka mariang, khamtam ha ka sor khappud jong ka Byrnihat nga la: 1) thoh bad ïakren bad u Myntri Rangbah badonburom ka Assam @himantabiswa ban thaw ïa ka komiti ban ïatreilang 2) Ka jingpeit bniah mariang jong baroh ki shnat karkhana ha ka Jylla Meghalaya ryngkat ka jingbuh por bad kaba na ka por sha ka por,” ong u Sangma ha ka rynsan lad pathai ‘X’ ha ka Sngi Thohdieng.
Ka ‘Task Force’ kaba kynthup ïa ki stad saïan bad ki karikor mariang jong ka Meghalaya State Pollution Control Board (MSPCB) ka la ïaid shakhmat bad ka kam jong ka ban pynlong ïa ka jingpeit bniah bad jingjurip ha Byrnihat.
Ka Sorkar ka la bynshet kam ha ka MSPCB ban pynlong ïa ka jingpeit bniah bad jingjurip kaba pura ïa baroh ki shnat karkhana kumjuh ban aiti ïa ka kaiphod sha ka Sorkar Jylla hapoh 7 sngi.
Ki jingtohkit banyngkong jong ka kynhun treikam ki la pynpaw ba bun na ki karkhana la lap ba ki treikam khlem da burom ha ka ban tehlakam ïa ka jingpynjaboh.
“Bun na ki karkhana kim ju pyndonkam (na ka por sha ka por) ïa ki Pollution Control Device (PCD) ban pynduna ïa ka jingmih ka lyer jakhlia. Ka jingpyndonkam ïa ki PCD ka jia tang haba don ki jingjurip jong ki kynhun Sorkar, bad kane kam pat biang,” ong u Member Secretary ka MSPCB, u Bah G.H. Chyrmang haba kren sha ki lad pathi khubor.
Ha kaba sdang jong une u snem, ka MSPCB ka la pynlong ïa ka jingjurip ba kynsan-kynsan ha ki shnat karkhana ha ka thaiñ Byrnihat ha ka 24, 27 bad 31 tarik u Kyllalyngkot, bad ha ka 5 tarik u Rymphang, 2025.
Ki jingjurip ki la pynpaw ïa ki jingpynkheiñ jong ki kyndon pynjaboh ba kynthup ïa ka jingmih lyer kaba jur na ki atoskhana namar ka jingbym treikam jong ki PCD, ka jingbym treikam ki tiar pynduna ba tehlakam ïa ka jingjaboh, bad ka jingbym pynpoi ïa ki jingtip lyngba ka ‘online’ halor ka ‘Emission Data’.
Ha u bnai Rymphang ba la dep, ka MSPCB ka la pynmih ïa ka hukum ban khang ïa hynriew tylli ki shnat karkhana bad daiñ kuna ïa ar tylli na kine naba ki la synñiang sha ka jingjaboh ka lyer kaba shyrkhei ha Byrnihat.
