Shillong, Lber 21
Ka Shillong Cantonment Board (SCB) ka la rai ban phah da ka byrta sha baroh ki nongshong shnong be-aiñ ha Lum Survey bad ka la jied ruh ïa ki jaka ban pyndait noh da ki CCTV khnang ban lah peitngor ïa ki kam bymman.
Ïa kane la pyntip da u Chief Executive Officer (CEO) ka Shillong Cantonment Board, Ayush Maurya hadien ba la pynlong ïa ka jingjurip ïa ki jaka ha ka Sngi Thohdieng ryngkat ki bor pynïaid district, ki nongkitkam shnong ka thaiñ bad ki pulit.
Ha kane ka jingleit jurip la lap ba ki don shibun ki briew ki bym lah ban tip ki wan na ei, kiba pynlong kum ka jaka sah da kaba pynïeng ïa ki ïing dara ha ka thaiñ Jhalupara.
Haba kren sha ki lad pathai khubor u Chief Executive Officer (CEO) ka Cantonment Board, u la ong ba ka Board ka la pynlong lang ïa ka jingjurip bad kiwei kiba don bynta, ha kaba u la pyntip ruh ba la ïoh ban khmih ruh ïa ki jaka kiba donkam ban pyndait ïa ki kor CCTV.
“Ngi la ithuh buh eh ha kito ki jaka kiba ju jia ki kam bymman bad tang katto-katne por ngin sa pyrshang ban pyndait noh ïa ki CCTV”, la ong u Maurya.
U CEO u la ong ruh ba ki don ki jaka ba ki briew ki la shong la sah bad thaw ïing be-aiñ bad ka Board kan sa pyrshang ban leh eiei noh ïa kine ki briew.
Haba kylli, u Maurya u la ong ba ka Cantonment kan sa leh da kaba tyngeh ïa baroh ki jingwan kyntur pud.
U la ong ba na ka liang ka Cantonment kan sa phah ïa ki byrta bad kan sa mudui ruh da ka ejahar ban leh eiei pyrshah ïa ki katkum ka aiñ.
“Baroh kiba shong ba sah ïing be-aiñ kin ïoh shwa ïa ka jingmaham ba ki dei ban mih noh. Katkum ka Rehabilitation Act, ngi donkam ban ai ha ki ïa katto-katne ki jaka bad ngi donkam ban ïakren bad ka Sorkar Jylla ha kano ka rukom ngin ïarap ïa ki”, u la ong.
U CEO u la ong ruh ba ha ka jingjurip la ithuh ruh ïa ki jaka ba dei ban pynïeng ïa ki kali, bad halor kane u la ong ba donkam ban don ka jingïatreilang bad ka tnat pulit pynïaid kali.
“Ngi la dep ithuh ruh ïa ki katto-katne ki jaka na ka bynta ban pynïeng kali. Ngi donkam ban ïadon bynta lang bad u SP ka tnat pynïaid kali, ha kaba ngin sa leh sa kawei ka jingjurip halor ki surok ïaid kali”, la ong u Maurya.
