Shillong, Lber 23
U Prof. DRL Nonglait uba long Director ka College Development Council, NEHU ha ka 21 tarik u Lber u la ïoh ban buh ïa u mawnongrim ban tei ïa ka jaka ai jinghikai ïa ki samla pule ka Khadsawphra College kaba don ha Mairang kaba dei na ka bynta ka subject Vocational Training Course kaba ki kolej ha kine ki sngi ki dei ban don na bynta ban ai jinghikai ïa ki samla pule katkum ka NEP kaba mynta.
U Prof. Nonglait ha ka jingkren u la ban bniah ïa ka jingdonkam ki VTC Course khamtam ka Carpentry kaba ki khynnah kin ïoh ban ïeng ha la ki jong ki kjat ynda ki la pyndep ïa ka Training Course kaba ki hap ban pule ha ki lai (3) tylli ki Semester. U la ai ka jingïaroh ïa ka Khadsawphra College kaba la lah ban shim ïa une u mawjam ban ai jinghikai pyntbit ïa ki samla pule ha kane ka liang ha kaba u sngewthuh ba ka rukom pynkhreh ka kolej ïa kane ka bynta kan long katkum kane ka juk technology. U kyntu ruh ïa ki bor pynïaid jong ka kolej ba kan sdang noh ïa ki PG courses khamtam ki Professional Course ha ki snem ban wan namar kum ka kolej ka la biang ban leh ïa kata.
U Dr. Boldness Lyngdoh Nongum, Principal ka kolej u la ïathuh ba ïa mynta ka kolej ka don saw tylli ki VTC subject na bynta ki samla pule jong ka. Kane ka Training Centre ba buh mawnongrim mynta ka dei na bynta kumno ban ai jinghikai ïa ki samla pule ha kaba ïadei bad ki kam misteri dieng (carpentry). Ka jinglut na bynta kane ka project ka long kumba T.1.25 klur kaba kynthup ïa ka building, ki machine, bording ilektrik bad ka um.
La ïoh ruh ka jingkren na u Babu Bakerphang War, Vice Principal uba la batai bniah shaphang ki VTC Course jong kane ka kolej ba nalor ka Carpentry, Vocal, Khasi Traditional Music, Desktop Publishing, yn sa plie sa kiwei pat ki Course kum ka Tourism, Fisheries, Fashion Designing bad kiwei kiwei namar ba ka kolej ka la don lypa ïa ki jingtei na ka bynta kitei ki subject.
Kiwei pat kiba la ai jingkren ha katei ka sngi ki long u Bah Beltestar Rani, Sordar ka shnong Mission Mairang kum Symbud Kongsan bad u Bah Lawanpynshngain War, President ka College. La pynshit pynshngaiñ ïa katei ka jingbuh mawnongrim da ki jingrwai na ki samla pule jong kane kolej.
