Shillong, Lber 23
Ka Election Commission of India (ECI) ka la ong ba palat saw hajar ngut ki Electoral Registration Officer (ERO) ki la pynlong ïa ki jingïalang bad ki seng saiñ pyrthei bapher-bapher ban pynbeit ïa ki mat kiba sahteng ha ka kyrdan jong ki jaka thep ‘vote’ ha la ki jong ki konstiwensi sha ki Ïingdorbar Thawaiñ.
“4,123 ngut ki ERO ha kylleng ka ri ki la pynlong ïa ki jingïalang bad baroh ki seng saiñ pyrthei ban pynbeit ïa kino-kino ki mat kiba dang sahteng ha ka kyrdan jong ki jaka thep ‘vote’ ha la ki jong ki jong ki konstitwensi sha ki Ïingdorbar Thawaiñ (Assembly Constituencies-AC),” ong ka kyrwoh na ka ECI ha ka Sngi Saitjaiñ.
Ha kajuh ka por, ka Commission ka la bthah ïa baroh 788 ngut ki District Election Officer (DEO) bad 36 ngut ki CEO jong baroh 28 tylli ki Jylla bad 8 tylli ki UT ha ki kyrdan jong ka Jylla/UT ba kin pynlong ïa kum kine ki jingïalang ban pynbeit ïa kino-kino ki mat kiba sahteng ha ki kyrdan jong ka distrik bad Jylla/UT, hapoh ka kyndon aiñ jong ka ‘RP Act’, 1950 & 1951, ‘Registration of Elector Rules 1960’, ‘Conduct of Election Rules 1961’ bad ki kot lyngkdop, ki kyndon bad ki jingbthah ba la pynmih da ka ECI na ka por sha ka por.
“Kine ki jingïalang ki la sdang da ka jingïashim bynta shitrhem jong ki seng saiñ pyrthei ha ka kyrdan jong ka Ri/Jylla. Ïa baroh kine ki jingïalang dei ban pyndep ha baroh kawei ka ri ha man la ki AC, distrik bad Jylla/UT hapoh ka 31 tarik u Lber, 2025,” ong ka kyrwoh.
Ka kyrwoh ka ong ruh ba kane ka long katkum ki jingbthah jong ka Commission ba la ïalam da u CEC, u Gyanesh Kumar ha ryngkat ki EC, Dr. Sukhbir Singh Sandhu bad Dr. Vivek Joshi ha ka jingïalang jong ki CEO jong baroh ki Jylla/UT bad uwei u DEO bad ERO na man la kawei-kawei ka Jylla ha ka 4 tarik Lber, 2025 ha IIIDEM, New Delhi.
Ka Commission ka la ong ba ki seng saiñ pyrthei lem bad ki nongmihkhmat ba la ai bor (jong ki) kum ki ‘Booth Level Agent’ (BLA), ki ‘Polling Agent’, ki ‘Counting Agent’ bad ki ‘Election Agent’ ki don la ki bynta ba kyrpang ban leh haba ïadei bad ki kam ilekshon bapher-bapher ba kynthup ruh ïa ka jingpynïaid ilekshon.
Shuh shuh ka Commission ka la bynrap ba ïa kane ka jingïatreilang ha ka kyrdan ‘grass-root’ la pdiang sngewbha da ki seng saiñ pyrthei, da ka jingïashim bynta shit rhem jong ki ha ki jingïalang ha kylleng ki konstitwensi, ki distrik, bad ki Jylla/UT.
“Ka Commission ka kyrpad ïa baroh ki seng saiñ pyrthei jong ka ri/Jylla ban shim kabu ïa kane ka jingïatreilang bad ki bor pynïaid ilekshon na ka bynta ban pynbeit ïa kano-kano ka mat kaba sahteng ha ka por ba la buh,” pynkut ka kyrwoh.
