Jowai, Lber 23
Ka shnong Khanduli kaba hap hapoh West Jaiñtia Hills District ka long kawei na ki shnong kiba dang don mynta ha ka jingïakajia khappud bad ka Jylla Assam haduh mynta mynne. Kumta ki nongshong shnong jong ka Khanduli ki ju ïakynduh ïa ki jingshah pyndik shah pynthut na ki Karbi jong ki shnong kiba marjan marpa na ka por sha ka por.
Ha kane ka kynti, ki nongtrei ka tnat Forest jong ka Assam ryngkat bad ki shi kynhun ki nongshong shnong Karbi kiba la rah ïa ki wait bad ki dieng ki la leit hiar sha ka khlaw Pdienlangho jong ka shnong Khanduli da ka jingthmu ban pynthut ïa ka jingpom dieng jong ki nongshong shnong Khanduli namar ki Karbi ki kam ba katei ka khlaw ka dang hap hapoh shnong Karbi ba tip kyrteng kum ka Tadonglangso.
Ynda la poi ha katei ka khlaw, ki nongtrei jong ka tnat Forest ki la leit bran-bran ban bat noh ïa kawei ka kali Bolero pickup kaba la ñiah hi da u trai kali ba la tip kyrteng kum u Ma Hom Muruh. Hynrei ynda u Ma Hom u la ïohi ïa ki nongtrei jong ka tnat Forest bad ki Karbi u la ieh ïa ka kali bad phet rieh bad rah lang ïa u shabi kali.
Kumta ym banse ki nongtrei jong ka tnat Forest ki hap ban shu tan noh ïa katei ka kali bolero pickup jong u Ma Hom da ka jingthmu ban leit rah ïa ka shaduh Hamrem, West Karbi Anglong District.
Na ka liang u Ma Hom u la pyntip mar-mar ïa ki bahaïing bahasem jong u bad u la bthah ïa ki ban leit da kawei pat ka Bolero kaba don ïa u number ML04-C-3505 sha shnong Todoo Langsoo lyngba ka surok kaba poi sha IB Assam hajan ka shnong Khanduli.
Katto-katne ngut ki bahaïing bahasem ki la leit sha katei ka jaka kumba la bthah da u Ma Hom, hynrei ynda ki la poi hajan kane ka jaka, katto-katne ngut ki Karbi ki la lynthem maw ïa ka kali bad ka ïit kali kaba na khmat ka la julor, bad ym banse kitei ki bahaïing ruh ki la phet noh na katei ka jaka hynrei u nongñiah jong katei ka kali ïa uba la tip kyrteng kum u Solmon Laloo, u la ngat ha ka kti jong ki nongtrei ka tnat Forest bad u la shah rah lang bad katei ka kali sha Hamren.
Na ka liang ki bor pynïaid District ki la phah mardor ïa u Executive Magistrate Ma GH Passah bad ki pulit sha ka shnong Khanduli khnang ban tehlakam bad ban pyllait ïa kitei ki kali.
Ki nongshong jong ka shnong Khanduli ki la ïamih paidbah ha ka janmiet jong ka 22 tarik da ka jingap khmih lynti ba kitei ki kali kin poi noh ha shnong hadien ba ki la bna khubor ba yn pyllait noh ïa kitei ki kali hadien ka jingshimkhia jong ki bor pynïaid district. Pynban katei ka jingap khmih lynti kam shym la urlong satia, namar la lah ban pyllait ïa ka kali bad u nongñiah haduh ka 23 tarik.
U nongñiah bad ka kali ki la poi ha shnong Khanduli ha ka miet jong ka 23 tarik, katba ïa kawei pat ka kali Bolero pickup yn sa pyllait ha ki sngi kiba bud.
