Shillong, Lber 23
Ka Drug Reduction Elimination & Action Mission (DREAM) jong ka Sorkar Jylla kan ïatreilang bad ka United National Office on Drugs and Crime (UNODC)na ka bynta ban pynlong ïa ka wad bniah ban ïoh lum jingkheiñ halor ka jingdon ki nongdih drok hapoh ka Jylla.
U Mission Director ka DREAM, Bah Francis Kharshiing, u la ong ba haduh mynta ym pat don satia ka jingkheiñ kaba biang pura halor ka jingdon ki nongdih drok hapoh ka Jylla.
“Hynrei, ngi la ïatreilang bad ka UNODC ban pynlong ïa ka jingwad kaba bniah halor ka jingdon ki nongdih drok ha Jylla” la ong u Mission Director haba kren ha ka sngi Palei hadien ka jingïalang bad ki seng samla shnong bapher-bapher.
U la ong ba la kyrpad ïa ka UNODC ba kan kyrshan ïa ka DREAM bad ha ka Sngi Thohdieng kan sa don ka jingïalang bad ki nongmihkhmat ka UNODC, ha kaba u la pynpaw ka jingkyrmen ban yn lah ban sdang noh ïa ka jingwad bniah bad lehse ha ki khyndiat bnai, yn lah ban ïoh ïa ka jingkheiñ kaba lah ban shaniah ba haduh katno ngut ki don ki nongdih drok ha ka Jylla.
Nalor kane, u Mission Director u la pyntip ba ki kynhun bapher-bapher ki la ai jingmut kiba tei kynthup ïa ka jingdonkam ban don ka jingpyni ïa ka ‘vocational training’ ha ki shnong bapher-bapher.
“Ngi la mynjur bad ngi la kyrpad ïa ki shnong bad ki Seng Samla khamtam ba kin don ka jingïakren ha la ki jong ki shnong bad ban sa wan pat sha ngi. Ngin sa pynkhreh ïa ka prokram ba kyrpang jong ki samla ha ki shnong jong ki khamtam ïa ki samla pule kiba la pass, hynrei ki bym don ïa ka sap treikam”, u la ong.
U la ong shuh shuh ba ki kynhun ai jinghikai kum ka ITI, Ram Krishna, Don Bosco Technical School bad kiwei-kiwei, ki long kiba la khreh ban ïatreilang bad ka Sorkar na ka bynta ban ai ïa ki jinghikai khlem kano-kano ka jingsiew.
U Bah Kharshiing u la ong ba na ka liang jong ka Sorkar ka kwah ban pynshlur ïa ki khynnah ba kin hikai ha ki kam bad ki sap bapher-bapher.
