Jowai, Lber 24
Haduh 19 tylli ki shnong na baroh ar tylli ki district ha Rilum Jaiñtia, kita ka West Jaiñtia Hills bad East Jaiñtia Hills la pynbna ba kim don jingpang TB na ka bynta u snem 2023-2024.
Ïa kane la pynbna ha ka jingrakhe ‘World Tuberculosis Day’ ha District Library Mynthong, Jowai halor ka phang kaba ong “Yes, We Can End TB: Commit, Invest Deliver”, ba la pynlong da ka District Tuberculosis Control, West Jaiñtia Hills District, Jowai.
Ka Additional Deputy Commissioner, Kong DV Lyngdoh kum ka kongsan jong kane ka sngi, ka la pynpaw ïa ka jingdonkam ban lap kloi bad pynsngewthuh na ka bynta ban ïakhun pyrshah ïa ka jingpang. Ka la ban jur ruh wat la ka jingpang TB ka long kaba lah ban ïada bad pynkoit, hynrei ka jinglap ïa ka ha ka por kaba biang bad ka jingsumar kaba biang ka long kaba donkam ban tehlakam ïa ka jingsaphriang jong ka.
Haba ai jingkren sha ki samla pule, ka Kong Lyngdoh ka la pynshlur ïa ki ba kin sumar ïa la ka jong ka koit ka khiah bad ban im ka rukom im kaba lehkhuid. Ha kajuh ka por ka la kyntu ruh ïa ki paidbah, ki nongtrei ka koit ka khiah bad ki jaka pule ba kin ïatreilang ha kaba pynsaphriang ïa ka jingtip shaphang ka jingpang TB.
Kiwei kiba la ai jingkren jingbatai ki long ka Dr. Ns. C. Tariang, MOTC Jowai TU, Panalair, Jowai, bad Dr. L. Marbaniang, Nodal officer, National Tuberculosis Elimination Programme (NTEP), East Jaiñtia Hills.
Ka District Tuberculosis ka la pynkup burom ruh ïa ki nongtrei ka koit ka khiah jong baroh ar tylli ki District ka West bad East Jaiñtia Hills namar ka jingaiti lut bad ka jingnoh synñiang jong ki ha ka jingïada ïa ka jingpang TB, ka jinglap, ka jingsumar, bad ka jingpynsngewthuh paidbah.
Ïa ki khusnam Best Treatment supporter la ai sha ka Kong Baita Lapasam na Barato PHC bad Kong Deciple Pychiang na Sutnga CHC. Ka khusnam Best Lab Technician la ai sha u Margeet Lyngdoh na Dawki PHC bad sha Kong Wanrika Sutnga na Khliehriat Civil Hospital. Ïa ka khusnam Best performing ASHA la ai sha ka Kong Jenitris Laamre na Barato PHC, Kong Amalia Lakiang ka Lookyrwiang UHC, bad Kong Kimeri Bareh na Jalaphet HWC, Sutnga CHC. Ïa ka khusnam Best MLHP la sam sha ka Kong Darihun Kharjahrin na Barato PHC bad Kong Sumarlin Laloo, na Iongkaluh, HWC, Pamrapaithlu PHC.
Kum shibynta jong kane ka sngi, ka District Tuberculosis centre, Jowai ka la pynlong ïa ka jingïakop dro dur katkum ka phang pdeng. Ka Kong Sanly Chyrmang na ka Children’s Home Girls, Jowai ka la ïoh ïa ka nam ba nyngkong, katba ïa ka nam ba ar la ai lang sha ka Sanwaka Challam na Children’s Home, Jowai bad ka Nangbah Nangjngi na Children’s Home, Jowai bad ba lai ka Resolve Dhar na Chilliangraij SSA School, Jowai bad Ibakordor Hadia, na Dulong SSA UP School.
Ha shwa kane la pynlong ïa ka jingïaid paidbah ban pynsngewthuh shaphang ka jingpang TB, kaba la sdang na madan ïalehkai Dulong bad la pynkut ha District Library Mynthong, Jowai. Ha kane ka jingïaid paidbah la shim bynta da ki samla pule, ki nonghikai, ki doktor bad ki nongtrei ka koit ka khiah ryngkat bad ki banner kumjuh ki placard.
