Shillong, Lber 24
Ka United Khasi People’s Organisation (UKPO) kaba dei ka seng jong ki ‘riew rangbah Khasi kiba shong ba sah ha Karbi Anglong ha ka sien kaba nyngkong ka la leit jngoh ïa ki Khasi Pnar kiba shong ba sah ha ka shnong Dhansiri kaba hap hapoh u pud u sam ka Karbi Anglong district kaba don markhap bad ka jylla Nagaland.
Ki nongshong shnong jong katei ka shnong ki la pynpaw ka jingsngewkmen haba ka UKPO ka la wan jngoh kyrpang ïa ki ha ka Sngi U Blei.
Kumjuh ki nongshong shnong ki la pynpaw ïa la ki jingeh hakhmat jong ka seng naduh ka roi ka par, ka kamai kajih bad kiwei kiwei kaba ki ïakynduh.
Na ka liang jong ka seng ka la kular hakhmat jong ki, ba kan shimkhia ïa ka jingeh jingshon jong ki nongshong shnong jong ka Dhansiri. Kaba kongsan haba leit sha ka shnong Dhansiri Khasi, da kaba thmu ban weng ïa ki jingeh jong ki nongshong shnong bad ban wad ki lad ki lynti na ka bynta ban kyntiew ïa ka imlang sahlang.
Ïa kane ka kynhun la ïalam da u President ka UKPO Bah Pynshngaiñlang, Secretary Bah Kular Skhem Khynriam, lem bad ki paralok jong ki, u Sunday Sten bad u Cletus Kholar Sten.
Ka kynhun ka la ïakynduh ïa u Goanbura (khlieh shnong) jong ka thaiñ bad ka la leit jngoh ïa ki longïing Khasi bapher bapher ban ïakren ïa ki jingeh kiba ka imlang sahlang ka ïakynduh.
U President ka seng Bah Pynshngaiñlang Rattane u la kyntu ïa ki bor synshar shnong ba kin buh hakhmat eh ïa ki jingeh jong ka jaidbynriew Khasi bad ban pyntreikam kloi katba lah ïa ki kam kiba donkam.
“Ka jaidbynriew Khasi kam dei tang ba ka shong ha ki thaiñ khappud hynrei ka shong ruh hapdeng jong ka Karbi Anglong kaba jngai tang 19 kilomitar na Diphu,” ong u Bah Pynshngainlang.
U la ban jur ba ka jingdon ki Khasi ha Karbi Anglong ka long kumba 25 hajar ngut eiei, hynrei ka jingpynrung kyrteng ha ka thup thep vote ka long kaba duna bha, kaba bunsien ka dei namar ka jingpyntip bakla bad ka jingleh thok, khamtam na ki bor nabar, kynthup ïa kito kiba sah ha ki jaka khappud.
Ka UKPO ka la long ka nongïakhih na ka bynta ka bha ka miat jong ka jaidbynriew Khasi, ha ki Elaka Karbi Anglong bad West Karbi Anglong. Kane ka seng ka la ïoh ïa ka jingshaniah bad ka jingïatreilang jong ki paidbah Khasi, kynthup ïa ki kynhun Pnar, Nongtung, bad Khyrwang. Ka UKPO ka dang ïai bteng ban shakri kum ka nongsumar ïa ka jaidbynriew Khasi, da kaba pynthikna ba ïa ka hok jong ki yn ïada bad ïa ka sur jong ki yn ïohsngew. Ka seng ka angnud ban ïatreilang bad ki bor synshar shnong ban weng ïa ki jingeh ba ki paidbah Khasi ki ïakynduh bad ban ïarap ban kyntiew ïa ka imlang sahlang jong ki.
Ka jingkhot jong ka UKPO ban leh kyrkieh ka pyni ïa ka jingdonkam kyrkieh jong ka imlang sahlang ïa ka jingkyrshan ha ki bynta bapher-bapher, kynthup ïa ka hok jied nongmihkhmat bad ki jingthmu pynroi.
