Shillong, Lber 24
U Lamphang ka ïingdorbar Thawaiñ, Thomas A Sangma, ha ka Lah Sngi U Blei u la hiar ban jurip bad ruh ban shong bishar kam bad lum jingkheiñ halor ka jingïaid jong ka kam halor ka jingtei ïa ka ïingdorbar thawaiñ ba thymmai jong ka Jylla ha Mawdiangdiang.
Ha shuwa kane, ka la don ka jingleit jurip ïa ka jingtei jong kane ka ïingdorbar ba thymmai ha Mawdiangdiang ha ka jingïadon lang u Symbud Lamphang Timothy D Shira, u Symbud Myntri Rangbah ka Jylla ba khmih ïa ka tnat Parliamentary Affairs Bah Prestone Tynsong, ha ryngkat u Commissioner & Secretary Andrew Simons, Additional Secretary Malthus Sangma, Cyril V Darlong Diengdoh, ki ophisar na ki tnat treikam bapher bapher ka Sorkar ba kynthup ïa ka tnat Public Works Department (PWD), Parliamentary Affairs Department, Design Associates bad na Assembly.
Ha ka jingïalang la ïakren ïa ka jingïaid jong ka projek bad kumno ban weng ïa kino-kino ki jingeh kiba long mawjynthut ban pyntyllun ïa ki kam.
U Lamphang u la pynpaw ïa ka jingsngewkmen ïa kaei kaba la mih na ka jingïalang, da kaba ban jur ïa ka jingdonkam jong ka jingïatreilang hapdeng baroh ki nongshim bynta ban pynthikna ïa ka jingpyndep ïa ka ïingdorbar thawaiñ ba thymmai ha ka por kaba biang.
