Shillong, Lber 24
Ha ka Sngi U Blei, uwei u rangbah u la pynkut noh ïa la ka jingim da kaba kynthih nalor ka jingkieng Dam (Umïam) bad ïa ka met la ïoh sei ha ka Lah Sngi U Blei.
Katkum ka khubor kaba la ïoh, la ong ba une u rangbah uba la pynkut noh ïa la ka jingim, u dei ba la tip kyrteng kum u Pritesh Deb ba shong ba sah ha Kench’s Trace, Laban bad uba buh dukan die tiar electronic ha Last Stop, Laban.
Hadien ka jingïoh jingtip halor kane, ki pulit ka State Disaster Response Force na ka tnat Home Guard ki la hiar sha katei ka pung bad ban ïoh sei noh ïa ka metïap jong utei u rangbah u bym dei Khasi uba la ithuh na ki kot ki sla kum u P Deb.
Katkum ka jingbatai jong ki briew kiba ïohi, une u rangbah u la law shwa ïa ka pla ba u kieng bad u la kynthih najrong jingkieng kaba dang shu dep maramot bad ngam jyllop ha pung Umïam. Ki la ïathuh haba kiba ïohi ki la leit ban ai da u tyllai kaba ju tong um da ka borti na kane ka pung hynrei u la kyntait ban shim ïa u tyllai bad ngam jyllop syndon shapoh ka um.
Na ka liang ki pulit ka SDRF kiba la wan wad ha ka Lah Sngi U Blei ka 24 tarik Lber naduh dang step, ki la ïoh ban sei ïa ka met ha ka por kumba 1:30 eiei mynsngi.
Ha kane ka sngi ki bahaïing ruh ki la wan ban ap haba ki pulit SDRF ki dang wad ïa ka metïap. Ki pulit ki la pyndep ïa ki jingdonkam baroh katkum ka lynti jong ka aiñ bad ka jingtohkit mynta ka la ïaid shakhmat halor kane ka jingjia.
