Shillong, Lber 25
Ka ïingbishar Special Judge (POCSO) jong ka East Khasi Hills ka la pynmih ïa ka hukum ha ka 11 tarik ban set along haduh 14 snem ïa uwei u briew uba la donkti ban leh be-ijot khynnah.
Ha kane ka hukum ba la pynmih da ka ïingbishar jong ka Swapna G Momin, ka la rai pynrem ïa utei u briew uba la tip kyrteng u Kluston Ryntathiang bad la pynsaja ïa u hapoh ar tylli ki kyndon ba kynthup ïa ka kyndon 6 POCSO Act bad ka kyndon 506 IPC.
Ka ïingbishar ka la hukum ban set patok haduh 14 snem ïa une u briew hapoh ka kyndon 6 jong ka POCSO Act bad un hap ban siew ïa ka kuna T.10,000 bad lada um lah siew, un hap ban shong patok sa 2 bnai.
Kumjuh, ka la pynngat ïa u hapoh ka kyndon 506 IPC da kaba hukum ban shong patok 3 snem bad ban siew ïa ka kuna T.5000 lym kumta un hap shong patok sa shi bnai.
Ïa kane la pyntip da u Superintendent of Police ka East Khasi Hills, Bah Vivek Syiem ha ka Sngi Ba-ar haba ïathuh ba ïa kane ka jingjia la tohkit da ka Inspector Phrianglin Syiem bad kaba trei mynta kum ka Reserve Inspector ha Police Reserve, Shillong.
