Tura, Lber 25
Ha kawei ka jingjia kaba sngew shyrkhei, kawei ka ïing mynbarim, kaba dei jong u Myntri Rangbah banyngkong eh ka Jylla, u Capt. Williamson Sangma, ka la kem ding bad mad ïa ka jingjulor kaba jur hadien kaei kaba la suba ba dei ka mashin kophi kaba sniew kaba la ïalam sha ka jingthut ha ka bording.
Kane ka jingjia ka la jia ha ka dong Hawakhana jong ka sor Tura.
Kane ka ïing ka dei ruh ka ïingsah jong u Fersen (Panseng) W. Momin, MDC barim na Tura bad u khun jong u Myntri Rangbah barim.
Ïa kane ka jingjia la pyntip nyngkong eh ha ka por kumba 11 baje ha ka step Sngi Ba-ar sha ka tnad F&ES bad hadien kata, ka kynhun ki pulit pynlip ding na Tura ki la leit mar-mar sha katei ka jaka ban tehlakam ïa ka jingjulor.
Hynrei namarba ka ding ka dei kaba la mih na ka jingthut ka bording, ka jingma jong ka jingmynsaw ka la nang jur ha kaba wat la phah ruh ïa ka kynhun SDRF bad ki kali pynlip ding (F&ES) na Rongram bad Dalu.
Kane ka kynhun ka la lah ban pynlip ïa ka ding hadien palat 3 kynta hynrei kat ha kata ka por, kiba bun na ki kamra ha katei ka ïing ki la shah pynjulor lut haduh bym lah shuh ban ithuh.
“Ngi suba ba ka ding ka la sdang na ka mashin kophi kaba la sniew bad ka la pur stet lyngba ki waïar ilektrik. Ki la don shibun ki tiar kiba lah ban kem ding kynthup ïa ki ‘Sofa’ bad ki kot ki sla kiba la ïarap ban pur sted ïa ka ding. Ngi la hap ban khot lang ïa ki lad jingïarap na man ki jaka ban pyntikna ha ka ban pynlip noh kloi ïa ka ding,” ong u SP ka tnad F&ES, u Bruno Sangma.
Ka ding ka la pur sted na kawei ka kamra sha kawei pat namar ka jingthut ha ka bording bad ha ka por kaba lyngkot eh, la jan baroh ki la kem ding lut.
U Sangma u la ong ruh ba ka don ka jingtieng ba ka ding ka lah ban pur lyngba ki waïar bording kiba wah hajrong hynrei ka jingwan poi biang por ban tuklar halor kane, ka la khanglad ïa kane ka jingjia.
“Ka don ka jaka theh umphniang hajan kumjuh ka ‘Indoor Sports Stadium’. Lada jia ba ka ding ka la pur lyngba ki waïar, ka lah ban leit sha baroh ki liang bad pynsniew shuh-shuh ïa ka jinglong jingman. Sngewnguh ba ngi la lah ban tehlakam ba kan ym jia”, la bynrap shuh-shuh u SP.
U Bruno u la ong ruh ba ka jinglum jingkheiñ halor ka jingjulor ka lah ban shim por katto-katne sngi naba ki trai (ïing jong u Capt. Williamson Sangma) ki donkam ban pynithuh kiei kiba la julor ha ka ding.
Hynrei ym shym la don kano-kano ka jingmynsaw namar bym shym la don mano-mano ha ïing ha ka por ba jia katei ka jingjia.
Ha kawei ka liang, u nongtrei mon sngewbha ha ka imlang-sahlang, u Cherian Momin u la pynpaw ka jingsngewsih halor ka jingshah pynjulor jong kawei na ki khyndiat tylli ki jingtei mynbarim ba kongsan ha ka sor Tura.
