Shillong, Lber 25
U MP ka Voice of the People Party (VPP) na Shillong Parliamentary konstitwensi, Dr. Ricky A.J. Syngkon ha ka Sngi Ba-ar u la dawa na ka tnad pule-puthi ka Sorkar Pdeng ban weng noh shi syndon ïa u Vice-Chancellor (VC) ka North Eastern Hill University (NEHU), u Prof. Prabha Shankar Shukla.
“Nga kwah ban pynsngew lyngba jong phi (Chairperson) halor ka mat kaba la buh jingeh bad ba kongsan haba ïadei bad ka North Eastern Hill University (NEHU),” ong u Dr. Syngkon haba ai jingkren hapoh Lok Sabha jong ka Ïingdorbar Parliament lyngba ka ‘Zero Hour’.
Haba kdew ba ha shuwa, ka NEHU ka long tang kawei na ki skulbah ka Sorkar Pdeng ha ka Thaiñ Shatei Lam Mihngi ha kito ka por, u MP u la ong ba ka jinglong-jingman jong kane ka skulbah mynta (kaba don ïa ka ‘tien phira “Rise Up and Build”), ka don hapdeng ka jingbym beit bym ryntih.
“Ka daw jong kane ka dei namar ka jingeh haba ïadei bad ka kam nongïalam kaba ka skulbah ka ïakynduh. Ka jingbym larkam jong u VC ba mynta ka la ïalam sha ka jingïakhih jong ki samla pule, nonghikai bad ki nongtrei (bym hikai) jong kane ka skulbah bad ka la ktah shi kat dei ïa ka jingkiew shaphrang jong ka skulbah,” u la ong.
Shuh shuh u la bynrap ba ha kine ki khyndiat bnai ba la dep, ka skulbah ka la shah ktah jur haba phai sha ka liang ka kam hikai bad kam wad bniah – kiba long ki jingthmu ba hakhmat eh jong kano-kano ka shlem pule.
“Nga kwah kumta ban kyntu ïa ka tnad ba dei khmih ban shimkhia ïa kane ka mat da kaba weng noh ïa une u VC,” ong u Dr. Syngkon uba la ïoh ban pynsngew ïa kane ka mat tang ha i por ba khyndiat eh.
