Shillong, Lber 25
Ka Drug Reduction Elimination & Action Mission (DREAM) kaba dei ka prokram jong ka Sorkar Jylla ban ïakhun pyrshah ïa ka jingdih bad jingkhaïi drok ha ka Jylla ha ryngkat ka jingïatreilang bad ki pulit ka Jylla, ha ka 24 tarik u bnai Lber, 2025, ka la pynlong ïa ka prokram ai jinghikai na ka bynta ki Village Defence Party (VDP) ïa kaba la pynlong ha ka Conference Hall jong ka Directorate of Social Welfare kaba don ha Lachumiere, Shillong.
Ha kane ka jingïalang la ïadon ryngkat lang da u Mission Director ka DREAM, Bah Francis Kharshiïng, u Superintendent of Police (SP) ka East Khasi Hills District, Bah Vivek Syiem, u Circle Adviser jong ka Village Defence Organisation, East Khasi Hills, Bah RD Rapthap, ki ophisar ka Social Welfare, ki nongkitkam jong ka DREAM bad ki nongmihkhmat bapher-bapher jong ka imlang-sahlang, kynthup ïa ki Rangbah Shnong, ki Seng Longkmie, bad ki Seng Samla, ki nongïalam jong ki kynhun VDP bapher-bapher na kylleng ka East Khasi Hills District.
U Mission Director ka DREAM, Bah Francis Kharshiïng u la ong ka jingangnud jong ka Sorkar ka long ban pyndonkam da ki VDP kum ka kti kamon-ka kti kadiang jong ka Sorkar ban tehlakam ïa u drok hapoh ki shnong-ki thaw.
“Ka jingïalang mynta ka sngi ka long ban ai jinghikai bad ban pynsngewthuh ïa ki VDP kumno ba ki lah ban trei. Ki don ki shnong kiba ym pat don ïa ki VDP bad ngi la kyrpad ba kin seng noh ïa ki VDP ha ki shnong-ki thaw jong ki”, ong u Bah Francis.
U Bah Francis u la ong, kane ka jingïalang ka long kawei na ki jingjop bakhraw ba na ka liang ka Mission ka la ïoh ban pynlong ha kaba la ïoh ban pynsngewthuh ïa ki VDP bapher-bapher ha kano ka rukom ki lah ban ïatreilang bad ka Sorkar, ki bor pulit bad kumjuh bad ka DREAM ban tehlakam ïa u drok.
U Bah Francis u la ïathuh ba bunsien na ka liang ki bor synshar shnong ki la ju pynsngew haba ïadei bad ka jingshem jingeh kum ki nongsakhi ha ka por ba ju don ka jingkem ïa ki nongdih bad nongdie drok ha kaba na ka liang ka Mission, ka la ai ïa ka jingpynshai halor kumno ban leh haba ki shem jingeh haba ïadei bad kane ka bynta.
Haba pynpaw ïa ka jingeh ha katei ka jingïalang, na ka liang uwei u nongïalam shnong, u la kyrpad ïa ka tnat pulit ba kan shimkhia haba ïadei bad ka jaka shim dawai ki nongdih drok kaba don ha Civil Hospital da kaba ong ba katei ka jaka shim dawai ka la kylla long pynban kum ka ktem ban ïadie bad dih drok bad kane ka pyni ba na ka liang ki bor pulit pat ki la leh matlah ban ïohi ïa kine kiei-kiei.
U la pynpaw ba kum u ‘riew rangbah u ju sakhi ïa ka jingdon ka jingkhaïi bad jingdih drok wat ha ki bynta ka thaiñ Polo ha kaba katei ka jaka kala long kaba ishyrkhei bha haduh katta-katta bad kaba buh jingma ruh ïa ka ïaid-ka ïeng jong ki paidbah kiba ïaid na katei ka jaka.
