Jowai, Lber 25
Ki samla pule ka Khadar Dolloi Law Collage, Jowai ha ka 25 tarik Lber ki la pynlong ka jingïatai halor ka hok thep ‘vote’ jong ki koidi halor ka phang “Prisoners in India should be allowed to cast their vote during election” ne dei ban ailad ïa ki koidi ha ri India ban thep vote ha ka por ilekshon.
Ïa kane ka jingïatai la pynlong ha Khadar Dalloi Law College, Jowai, ha kaba ki samla pule ki la wanrah ïa ki jingïatai ïakren na baroh arliang halor kane ka phang bad ba la bishar da ka Kong B Majaw, Secretary District Legal Service Authority (DLSA), West Jaiñtia Hills. U NA Khan, District & Session Judge, West Jaiñtia Hills, ha ka jingkren u la ban jur halor ka jingdonkam jong ka phang namar ka ïasnoh bad ka synshar paidbah, ka riti synshar.
Ki samla pule ki la pynsngew ïa la ki nia da kaba pynpaw ïa ki mat ba la wad bniah bha na baroh arliang. Ki samla pule kiba kyrshan ïa kane ka phang ki la pynsngew ïa la ki nia kynthup naduh ka hok kum ki nongshong shnong ha ka synshar paidbah, katba kiba pyrshah pat ki pynksan ïa ki jingeh ha ka liang ka jingïada bad ki jingeh ha ka liang ka aiñ.
Ïa ka nam jop la rah da ka liang pyrshah, katba ïa ka nam Best Speaker ne u nongkren ba tbit tam la ïoh da u E Syngkon uba na ka liang kyrshan.
Ïa kane ka jingïatai la pynïaid da u FB Passah, Assistant Legal Aid Defence Counsel katba u Principal Khad-Ar Dalloi Law College, Jowai Bah I Khyriem u la ai ki kyntien khublei.
