Shillong, Lber 25
U Myntri Rangbah ka Jylla, Conrad K Sangma ha ka Sngi Ba-ar u la plie paidbah ïa ka 7th Act East Business Show ba lai sngi ha nongbah Shillong, ba la pynïaid da ka Indian Chamber of Commerce da ka jingïatreilang bad ka Sorkar Meghalaya da ka thong ban pynskhem ïa ka jingïadei bad ki ri marjan hapoh ka BBIN bad ASEAN.
Haba kren ha kane ka sngi, u Conrad u la ong ba na ka bynta ka thaiñ Shatei Lam Mihngi ym dei ban don tang kawei ka polisi treikam namar ki Jylla ki ïapher na kiwei pat. U la ong ba man ki Jylla ki dei ban pynleit jingmut ha kino ki kam ba ki kwah bad ka jingïatreilang bad ki ri marjan ka ban ïaid katkum ka jinglong ki jaka bad ka jingkhlaiñ ha ka ïoh ka kot.
“Man la ki jaka bad man la ki Jylla ha ka thaiñ Shatei Lam Mihngi ki long kyrpang, kumta dei ban don beit thik da ka thong bad rukom treikam ba kyrpang ha man la kawei-pa-kawei ka jaka bad Jylla”, u la ong.
Haba pdiang sngewbha ïa ki nongwan ïashim bynta kiba na Australia, Bhutan, Germany, Malaysia, Indonesia, Philippines, Thailand bad UAE, u Myntri Rangbah u la ong ba ka Meghalaya ka thrang ban pynkhlaiñ ïa ka jingïadei bad ki ri ba don hapoh ka BBIN bad ASEAN, ha kaba u la bynrap ba ka jingïajan ka Jylla bad ka Dubai, ki ri ba don hapoh ka BBIN bad ASEAN kan pynlong ïa ka Meghalaya ka Jylla ha ka khaïi-pateng.
“Ka jingïai neh ka lah ban wan tang lada ngi trei da kaba ïaid ryngkat ban burom ïa ka mariang, ki riti dustur, ki jinglong tynrai bad ki shnong. Kum ka Sorkar ngi don ka jingngeit ba ka jingkiew ka Jylla ha ki liang baroh ka long kaba kongsan bad haba ngi jam shakhmat ngi dei ruh ban burom ïa kiei kiba don lypa”, la ban jur u Myntri Rangbah.
U nonglam ktien ka Germany sha India, Dr. Philipp Ackermann u la pynpaw ïa ka jingthrang jong ki kompani na Germany ban wan sha India khamtam ha ka thaiñ Shatei Lam Mihngi, ha kaba u la ong ba mynta u snem na ki 2000 tylli ki kompani kiba don ha Germany, 59 percent ki don jingthmu ban wan seng kam thymmai sha ri India.
Ha kane ka sngi la ïoh ruh ïa ka jingkren na u Symbud Myntri Rangbah ka Jylla ba khmih ïa ka tnat Karkhana, Bah Sniawbhalang Dhar, nonglam ktien ka Philippines, Josel F Ignacio, u High Commissioner ka Malaysia, Dato Muzafar Shah Mustafa, Minister bad Deputy Chief of Mission ka Thailand sha India, Thirapath Mongkolnavin, Consul General ka Bhutan, Jigme Thinlye Namgyal, Deputy Consul General, Consulate of Australia, Kevin Goh, Counsellor-Economic Affairs, Embassy of Indonesia, Erry Herjuno, Chairman, ASEAN India economic Council, Malaysia, Dato Ramesh Kodammal, u Chief Secretary ka Meghalaya, Donald Philips Wahlang bad kiwei kiwei.
