Shillong, Lber 25
Ka jingshah tuh jong ki arshaka kumjuh ka jingshah prong tuh jong ki ïing ki sem ha kylleng ki bynta jong ka nongbah Shillong bad ruh sha kiwei ki bynta jong ka jylla ka la nangjur na kawei ka sngi sha kawei pat. Kane ka la pynlong haduh ban wanrah ka jingbym shngaiñ shuh na ka liang ki trai kali ne trai ïing.
Katkum ka khubor kaba la ïoh lum na ki pulit la ong ba ha ka 23 tarik mynta u bnai, ha ka por kumba 12.30 shiteng synñia, ki runar bym lah ban ithuh, ki la thang ïa ki ar tylli ki arshaka, kata kawei kaba don ïa u registration number ML05-X-1383 kaba dei jong u Bah Richard Sunn bad kawei pat kaba don ïa u registration number ML05-AC-4521 kaba dei jong u Bah Robinson Syiem ha Mawlai Motsyiar, Shillong.
Ha kawei pat ka khubor, u Chubat Jediel D Sangma u la ujor sha ki pulit ba ha ka 20 tarik mynta u bnai, ki runar bym lah ban ithuh, ki la prong tuh hapoh ka ïing ka jong u, kaba don ha Lumiablot Block-B, Shillong bad ban tuh ïa ka pisa kaba long T.30,000/-, kawei ka Laptop bad kawei ka mobile phone.
Katba na ka liang jong ka Kong Kieziela Nring bad Kong Merina Lyngdoh ki la ai lang ka jingujor sha ki pulit ba ha ka janmiet jong ka 21 tarik mynta u bnai, ki runar bym lah ban ithuh, ki la prong tuh hapoh ka Mewanri Girls’ Hostel kaba don ha Dongmawbynna Lapalang, Shillong bad ban tuh ïa kawei ka mobile phone ryngkat u charger, uwei u power bank bad ki pisa nar barim kiba dei jong ka Akhrolie Therie.
Ha kawei pat ka khubor, u Udil Teron uba na Pynker-A (Ri-Bhoi) u la ai ka jingujor da kaba shu kren da ka ktien sha ki pulit ha ka 22 tarik mynta u bnai ha Pillangkata OP (RB) ba ki runar bym lah ban ithuh ki la tuh ïa ka arshaka ka jong u, kaba don ïa u registration number AS01-EZ-9658.
Kumjuh, u Joakhim M Sangma u la ai ka jingujor ba ha ka miet hapdeng jong ka 21 bad 22 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number AS18-G-2098 na ka jaka set kaba don ha Salpara, Mendipathar ha North Garo Hills.
