Shillong, Lber 26
Ka Kynhun Myntri jong ka Sorkar Jylla ha ka Sngi Balang ka la mynjur ïa ka rai ban pynkynriah noh ïa Police Reserve kaba don ha Jail Road sha Tynring kaba hap hapoh ka sor thymmai lane ka New Shillong.
Haba kren bad ki lad pathai khubor, u Myntri bad Nongaiktien ka Sorkar MDA-II, Bah Paul Lyngdoh u la ong ba kane ka sienjam ba ka Sorkar ka la shim ka long ban pynduna ïa ka jingkhapngiah hapoh ka sor Shillong.
“Khnang ban pynkylluid ïa ka sor Shillong, ïa ka Police Reserve yn pynkynriah noh sha Tynring, New Shillong ha ka jaka kaba heh 50 akar”, la ong u Bah Paul.
Haba kylli, u Bah Paul u la ong ba ka jingthmu jong ka Sorkar ïa mynta ka long beit ban pynkylluid ïa ka Shillong, bad ïa ka thanat kaba don marjan bad ka Police Reserve ruh yn pynkynriah lang noh sha Tynring, hadien kata yn sa pyrkhat pat kumno yn pyndonkam ïa ka jaka ha Jail Road.
“Mynta ka sngi ngi la mynjur da ka Kynhun Myntri ban pynkynriah bad ngin pyrshang ban leh noh kloi katba lah. Shisien ba la pynkynriah ïa ka Police Reserve bad ka thanat, ngin sa rai pat kumno ban pyndonkam ïa ka jaka, namar ki don shibun ki jingdonkam bad ïa kata yn sa leh da ka tnat ba dei khmih”, u la ong.
Ha kawei ka liang, ka Kynhun Myntri ka la mynjur ban pynbun ïa ka shuti kyrpang (Special Casual Leave) ki nongtrei na ka 15 sngi sha ka 30 sngi ha ka shisnem.
U la ong ba ïa kane ka rai la shim khamtam na ka bynta ban ailad ïa ki nongtrei Sorkar kiba ju ïalehkai ha ki kyrdan bapher-bapher.
“Haba don ki jingïalehkai ba donkam ban ïashim bynta lang ki nongtrei Sorkar, ha ka por ba ki leit ïalehkai yn shim beit ba ki trei beit ïa ka kam jong ki. Kane kan ïarap ruh ïa ka Jylla ha ka jingpynkhreh ïa ki jingdonkam ha ka National Games”, la ong u Bah Paul.
