Shillong, Lber 26:
Kum shibynta ka jingkynjoh ïa u mawmer ba 25 snem ha ka jingshakri ïa ka kam naduh ba la seng, ka Motphran Auto Rickshaw Owner’s & Driver’s Association (MARODA) ha ka Sngi Balang ka 26 tarik u bnai Lber, 2025, ka la pynlong ïa ka prokram rakhe ïa kane ka lyngkhuh jubilee rupa ïa kaba la pynlong hapoh ka Indoor Sports Hall jong ka shnong Phudmuri.
Ha kane ka sngi, u Kongsan u dei Bah Ronnie Wahlang uba dei u Additional Deputy Commissioner ha ryngkat ka jingïadonlang u Bah Allantry Dkhar kum u nongshah khot sngewbha, ki Rangbah Shnong jong ka Dorbar Shnong Umsohsun, Mawkhar bad Mawlai Phudmuri, ki pulit pynïaid kali jong ka Mawlai bad Lumdiengjri Police Station.
Haba kren sha ki katto-katne ngut ki lad pathai khubor, u Bah Evandul Marbaniang, President ka MARODA, u la ong ba ka jingdap 25 snem jong ka kynhun ka dei ka lynti kaba eh bha kaba kum ki nongñiah Auto Rickshaw ki mad bad hateng-hateng ka ju mih ka jingshah khñium ha ki paidbah nongshong kali hynrei kum ki nongñiah ki don ïa ka jingpyrkhat ban ai ïa ka jingshakri kaba bha tam.
U Bah Marbaniang u la ong ba na ka liang ka kynhun ka ju ïaleh katba lah kot bor ban noh synñiang sha ki jaka ri khunswet, ki jaka ri ïa ki tymmen-ki kro bad kumjuh sha ki longïing-longsem kiba duna ha ka ïoh-ka kot.
Na ka liang u Bah Thrangbor Sawiang, General Secretary ka MARODA, u la ong ba ha ki por ba u la sdang ban kamai Autorickshaw, ki la don tang hapoh kumba 50 tylli eiei hynrei kham hadien kata ha ki snem 2007 ter-ter haduh 2012, ki la don haduh kumba 100 tylli tam eiei ki Autorickshaw.
U la ïathuh ruh ba mynta ha kine ki snem, ka jingdon jong ki Autorickshaw k ala kham duna bha bad ka daw jong kane ka dei namar ka jingbym biang shuh ha ka jingkamai.
Ha kane ka jingrakhe, la ïoh ruh ïa ka sur pynbyrngia na u samla Bandap Sutnga, Damehipaya Shabong bad kumjuh na ka kynhun Jo Thong.
