Nongpoh, Lber 26
Ka rukom pynkhreh-pynkhrum na ka bynta ka jingshad bad lehniam tynrai ba shisien shi snem jong ki khun ki hajar ka Raid Nongpoh kaba la tip kum ka Shad Sajer ka la ïaid shaid-shaid ha u Lum Wyrtoh uba don marjan bad ka sor Nongpoh.
Haba kren sha ki lad pathai khubor, u Lyngdoh ka Raid Nongpoh, Bah Linus Lyngdoh, u la ïathuh ba ka jingpynlong ïa kane ka jinglehniam ka dei shibynta ban pynneh pynsah ïa ka riti ka dustur kumba la buh da ki longshwa manshwa bad ruh ban pyni sha ka pyrthei halor ka jingriewspah jong ka kolshor jong ki khun ki hajar ka Raid Nongpoh.
U la ïathuh ruh ba ha katei ka sngi, kata ka 29 tarik u Lber, 2025 nalor ka put ka tem bad ki jingshad tynrai, kin don ruh ki jingïalehkai tynrai kum ka jingïatan tyllai, ka jingkiew siej nalor kiwei kiwei de ryngkat ki dukan ki ban die ïa ki jingbam tynrai. U Bah Lyngdoh u la ïathuh ruh ba ha katei ka jinglehniam Shad Sajer yn wan ban sakhi da u Symbud Myntri Rangbah ka jylla, Bah Prestone Tynsong kum u kongsan bad u MLA ka Nongpoh, Bah Mayralborn Syiem kum u symbud kongsan nalor kiwei kiwei de ki nongshah khot sngewbha.
Halor kane ka bynta, na ka liang u Bah Linus Lyngdoh u khot bad wer sngewbha ïa baroh ki paidbah ba kin wan ban sakhi da la ki jong ki khmat ïa kane ka jinglehniam kaba kyrpang jong ka Raid Nongpoh bad pyntip ruh ba kito ki bym don kali ban kiew sha u Lum Wyrtoh na Pahamsyiem, ka Raid ka la pynbiang ïa ki kali na ka bynta jong ki paidbah ba kin poi sha katei ka jaka lehniam.
