Nongstoiñ, Lber 26
Shi sngi hadien ba ki paidbah nongshong shnong na ki shnong bapher bapher jong ka West Khasi Hills ki la leit tur sha ka ophis jong ka MePDCL Nongstoiñ Division, halor ka jingïoh kyndit ka jong ki ïa ka jingthoh na ka tnat MePDCL ban wan siew noh ïa ka bai thang bording kiba la kot sha ki phew hajar bad don ruh kiba poi lak tyngka, ha ka Sngi Balang jong ka taïew ki paidbah ha ryngkat ki Nongïalam jong ka HNYM ki la leit ban ïakynduh bad aiti ruh da ka jingthoh ha u Deputy Commissioner (DC) ka West Khasi Hills ban kyntu ba un shimkhia lem ïa katei ka bynta ban phah sangeh shuwa ïa ka jingbthah ba la ai da ka tnat ba dei peit.
Lah ban kdew hangne ba katkum ki jingthoh ïa kaba ka MePDCL Nongstoiñ ka la phah sha ki kyrteng jong kitei ki ïing ban siew ïa ka bai thang bording, ka dei na ka bynta kiba khlem pat siew lut ïa ka bill light kaba ki la pyndonkam hynrei kiba la dep shah ot (disconnect) katto katne por ïa ka bording, bad don ruh katto katne kiba dang siew ïa ka bai bording hynrei ki la ïoh kyndit-kyndit ïa ka jingthoh na ka tnat MePDCL ban wan siew ïa ka bill light.
Shuh shuh haba peit bniah ïa katei ka jingthoh, ïa kaba ka MePDCL Nongstoiñ ka la phah sha ki longïing, ka MePDCL ka la pyntip ba ka don ruh ka skhim OTS na ka bynta kiba shah ot ïa ka bording bad kiba don 5 Kw shapoh tang na ka bynta ki DLT & BPL.
U President ka HNYM West Khasi Hills, Bah Tailan Lyngkhoi haba kren sha ki lad pathai khubor hadien ka jingïakynduh ïa u DC, u la ong ba ha ka jingïakynduh na ka liang jong u DC u la kren shai ba ha kaba ïadei bad ka jingdawa phah sangeh yn nym lah ban pynsangeh hynrei hap ban ïaid beit shakhmat, hynrei u la kular ba un sa thoh sha ka MePDCL ba ym dei ban phah siew ar sien ïa ka bai thang bording ïa ki paidbah kiba siew manla u bnai, katba ïa ki longïing ba ïohpdiang ïa katei ka shithi ka dei ka kamram jong ka tnat bording ba kan peit bniah katba ïa kiba sah ram bad shah ot bording ka tnat ka dei ban pynshai sha ki longïing ba naduh mynno ki sah ram.
Shuh shuh la ïathuh ruh ba na ka liang u DC u kyntu ruh ïa ki paidbah ba kin buh jingkheiñ lang ban lah pynshisha haba ki siew bai bording man la u bnai.
Kumta, na ka liang ka HNYM ka kyntu ïa ka tnat bording ba kan shimkhia ban pynbeit ïa kine ki kynrum-kynram khnang ba kan ym buh jingeh ïa ka ophis bad khamtam ïa ki paidbah kiba pyndonkam bording.
