Shillong, Lber 26
U Chief Executive Member (CEM) ka Khasi Hills Autonomous District Council, Bah Shemborlang Rynjah, u la ong ba ka Executive Committee kan dang bishar bniah la kan dang bteng ne sangeh ban pynlong biang ïa ka Monolith Festival.
Ïa kane ka jingjubab u Bah Shemborlang ka dei halor ka jingkylli ba la buh da ka Kong Grace Mary Kharpuri kaba dei ka MDC ka NPP na Nongshken ha ki kynta kylli jingkylli kaba la long ha ka Sngi Balang haba sdang ka dorbar mang tyngka jong ka KHADC.
Ka Kong Grace Mary ka la buh jingkylli biang haduh katno ka shimpor ban bishar bniah, na ka liang u Bah Shemborlang u la ong ba ka EC kam pat tip lano kan bishar bniah hynrei kan peit ïa kaba bha tam.
Sa kawei ka jingkylli ba la buh da u MDC ka UDP na Mairang Bah EL Nongrang, u la ong ba ka Council ka don jingthmu ne em ban buh ïa ka tnat treikam ha Mairang kaba hap ha Eastern West Khasi Hills District, na ka liang u Bah Pynkhraw Kharjahrin uba dei u Executive Member u la jubab ba haduh mynta kam pat don ka jingthmu ban buh ophis ha Mairang.
U Bah EL Nongrang u la pynsngew ba na ka liang ka EC kaba rim ka la don ka jingthmu ban buh ïa ka tnat treikam ha Mairang hynrei u Bah Pynkhrawboklin u la pynshai ba ka la don ka jingïakren ha ka EC kaba rim kaba la leit peit hynrei ïa kata um pat lah ban ong namar ka dei tang ka jingleit peit hynrei ym pat don ka jingïasoi bad ki trai jaka.
Haba bynrap ïa ka jingjubab, u Bah Shemborlang u la ong ba kaba donkam shisha ka jingai jingmut na ka liang ïatei ban shimkhia ban bishar bha kaei ka bynta ban ïoh plie ïa ka ophis ha Mairang.
Ha kawei pat ka jingkylli ba la buh da u Bah EL Nongrang, u Bah Shemborlang u la jubab ba ki don haduh 11 tylli ki jaka thung dieng jong ka Council.
Shuh shuh, u Bah Shemborlang u la jubab ruh sa kawei ka jingkylli ba la buh da u Bah EL Nongrang ba ka Council ka la thung ïa u Bah TT Diengdoh uba dei u nongïasaid aiñ uba la kham slem kum u dkhot jong ka Special Council ha ka 16 tarik Nohprah 2021.
Ha kajuh ka sngi, u Executive Member ba dei peit ïa ka tnat pla tyngka Bah Seiborlang Warbah u la ïoh ban wanrah ïa ka mang tyngka ban pynlut na bynta kaba lai bnai ha ïingdorbar ka Khasi Hills Autonomous District Council ha ka sngi sdang.
Kane ka mang tyngka kaba lai bnai kan sdang naduh 1 tarik Ïaïong 2025 haduh 30 tarik Jylliew 2025 kaba la mang haduh laiphew san klur sawphew lak sanphew san hajar hynriew spah tyngka.
Haba ai jingkren haba wanrah ïa ka mang tyngka u Bah Seiborlang Warbah u la pyntip ba u snem mang tyngka jong u snem 2024-25 kan kut noh ha ka 31 tarik Lber 2025, kumta ka Executive Committee kam pat lah ban wanrah ïa ka mang tyngka kaba pura jong u snem 2025-2026 namar ka jingthmit jong ka por bad ïa mynta hi la pynkhreh ïa ka mang tyngka kaba lai bnai bad ïa ka mang tyngka kaba pura jong u snem 2025-2026 yn sa wanrah ha ka sien shong dorbar ka ban wan.
