Shillong, Lber 26
Ka KSU Shillong Mihngi Circle ha ka Sngi Balang ka la pynphai noh ïa palat 30 ngut ki nongtrei bar jylla ki bym don ki kot ki sla ba biang kiba trei ha kawei ka jaka ha Polo Hills.
Hapoh ka jingïalam u samla Banjop Dkhar, Organising Secretary, ka KSU Shillong Mihngi Circle ka la leit ban khynra ïa kawei ka jaka trei kaba don ha Polo Hills ha kaba ka la lap kumba 35 ngut ki nongtrei bar jylla ki bym don ki kot ki sla kiba biang.
Ïa kine ki bar jylla bym don kot don sla la pynphai noh shi syndon na katei ka jaka.
“Ka seng kumba ju long kan dang ïai bteng ka jingkhynra mynder khamtam sha ki jaka trei bad maham ïa ki nongwanrah nongtrei bar jylla khlem ki kot ba biang,” ong ka kyrwoh na ka seng.
