Shillong, Lber 26
Ka North Eastern Hill University Teachers’ Association (NEHUTA) ka la pynrem jur bad kyntait halor ka jingthung Pro Vice-Chancellor ïa ka Prof. S.M. Sungoh ha Shillong bad Prof. Familine K. Marak ha Tura.
Ïa kane ka rai la shim ha ka ‘General Body Meeting’ (GBM) jong ka seng kaba la long ha ka 25 tarik mynta u bnai.
“Ka NEHUTA ka pynrem jur ïa ka jingthung bad jingpynïasoh jong kine ar ngut ki Pro VC – Prof. S. M. Sungoh ha Shillong bad Prof. Familine K. Marak ha Tura Campus namarba ka dei ka jingleh be-aiñ jong u Prof. Shukla,” ong ka kyrwoh na ki nongïalam na ka seng.
Ki nongïalam ki la ong ruh ba ka seng naduh u Naiwieng mynshem snem haduh mynta ki kyntait war haba ïadei bad kane ka jingthung ïa ki Pro. VC.
Halor u Vice-Chancellor (VC) ka NEHU, Prof. P.S. Shukla, ki la ong ba u Prof. Shukla uba la shim shuti lyngba ka ‘Earned Leave’ katkum ka jingai jingmut jong u Director Higher Education, ka Sorkar India naduh ka 15 tarik u Naiwieng, 2024 kaba u la pynjlan haduh ka 2 tarik u Lber, 2025 um pat wan pynïasoh mar-met (hadien ka jingshim shuti) sha Headquarter ka NEHU Campus Shillong haduh kine ki sngi.
Ka seng ka la ong ruh ba kane ka long kum ka jingbym don hapdeng ka jingshakri ha ka Headquarter ha NEHU, Shillong na bynta 131 sngi lynter.
Haba kdew ba ïa ka kaiphod ‘Inquiry Committee’ ym pat shym la pyllait da ka tnad pule-puthi ka Sorkar India, ka seng ka la ong ba kumta ym pat lah pynbna ba u Prof. Shukla u donkti halor ki jingkynnoh pyrshah ïa u.
“Kaba kham sngewkhia ka long ba katba baroh ki ‘stakeholders’ ki la pyrshah ïa ka jingbteng u Prof. Shukla ha ka kam VC, bad kumjuh u MP jong ngi, u Dr. Ricky A. J. Syngkon uba la rah ïa ka mat ban weng noh ïa u VC wat ha Parliament, ki briew jong ngi hi ki kyrshan ïa u Prof. Shukla bad pynlong aiñ ïa ki kam be-aiñ jong u, ki jingpynkheiñ ïa ka ‘NEHU Act & Statutes’, kyndon ka Sorkar India bad ka jinglong pyrshah ‘riewlum bad pyrshah Meghalaya kiba u la pynpaw ha ka samoi treikam jong u,” ong ki nongïalam ka NEHUTA.
Hashuwa, ka seng ha ka GBM ka la pynpaw ka jingsngewkhia kaba khraw halor ka jingbym don u VC (ha skulbah) ban peit ïa ki kam ki jam jong ka skulbah naduh ka 6 tarik u Lber, 2025.
“Ka NEHUTA, NEHUNSA bad NEHUSU ki la kynjoh sha ki nonghikai (Professor) ba la rangbah tam katkum ka ‘Seniority List’ ban shimti bad pyndep ïa ka kamram jong u VC; hynrei 4 ngut ki nonghikai ba rangbah ki la kyntait bad ka Prof. S.M. Sungoh ka dei ka nonghikai ba rangbah tam kaba bud katkum ka jinglong rangbah ha ka kam,” ki la ong.
Ka GBM ka la rai ruh ba ka jingthung Pro Vice-Chancellor katkum ki jingpynbna ba la pynmih da u Assistant Registrar, Planning, ha ka 13/11/2024 bad hadien pat da u Omkar Singh, ha ka 14/11/2024, kam long kaba lah ban pdiang namar ki daw ba ka jingïalang ‘Executive Council’ kaba ka rai ban thung ïa ki Pro VC kam don ïa ka jingbun paid (kaba rit eh) ban shim rai (quorum).
“Shuh shuh, u VC, uba khlem don ha HQ jong ka NEHU, Shillong, um shym la bud ïa ki rukom treikam kiba dei kumba la kdew hapoh ka ‘NEHU Statute 3’. Ha ki shithi thung kam hi, u la sot ïa ka ‘Statute 3’ kaba um shym la bud ryntih, bad kumta, lah ban kheiñ ïa ki jingleh jong u kaba long palat ban ïa kaei ba la ai bor ha u,” ong ki nongïalam ka seng.
Shuh shuh ka seng ka la kdew ba ïa katei ka shithi la pynmih da u Omkar Singh, uba don hapdeng ka shuti naduh ka 3/11/2024 bad u bym shym la pynïasoh sha HQ jong ka NEHU, Shillong haduh kine ki sngi.
Nalor kata, ïa ki jingleh jong u Prof. Shukla & Omkar Singh ha ka por ba ki dang don hapdeng ka shuti bad ka jingbym don ha HQ ha NEHU, Shillong la pyndam noh da u Vice Chancellor (Acting) ha ka 23/11/2024.
“Ha ka jinglong-jingman kaba mynta, naba ka Prof. S. M. Sungoh ka la long ka nonghikai ba rangbah tam (kaba lait) katkum ka ‘Seniority List’, ka General Body jong ka NEHUTA ka la rai da kawei ka jingmut ban kyrpad ïa ka Prof. Sungoh ban shimti ïa ka kam kum ka Acting Vice-Chancellor da kaba pyndonkam ïa ka NEHU Statute 2 (A) (5) (i),” la ong ka seng.
