Shillong, Lber 26
Ka Kynhun Myntri jong ka Sorkar Jylla ka la mynjur ïa ka rai ban thied ïing mala kaba heh ka ban dei ka Meghalaya ‘Guest House’ ha Bangalore ban pynbiang jaka sah ïa ki briew jong ka Jylla kiba leit sha Bangalore bad khamtam ïa ki samla pule kynthei bad shynrang.
Haba kren bad ki lad pathai khubor ha ka Sngi Balang, u Myntri Sorkar ba dei ruh u Nongaiktien ka Sorkar MDA-II, Bah Paul Lyngdoh u la ong ba kata ka ïing mala (Building) kaba la tyrwa ban thied ha Bangalore kan lah ban ai jaka sah ïa 50 ngut ki samla shynrang bad 50 ngut ki khynnah kynthei.
“Ka Bangalore ka dei ka jaka kaba ki briew na ka Meghalaya ki leit bha bad ngi don ruh ïa bun ngut ki khynnah pule kiba leit ban pule ha ki kyrdan bapher-bapher ha katei ka nongbah”, u la ong.
U la ong ba ïa mynta kaba donkam kyrkieh ka dei ïa ki samla pule namar kiba bun ki samla ba leit pule sha katei ka nongbah ki ïakynduh jingeh ban ïoh ïa ki jaka sah kiba biang.
Haba kylli, u Myntri u la ong ba ka Sorkar ka la pyrkhat ban tei ïa ka Meghalaya House, hynrei kumba ka long mynta ka jingdonkam ba kyrkieh ka dei ïa ki samla pule.
“Kaba kham donkam kyrkieh mynta ka long ban pynbiang ïa ka jingdonkam jong ki samla pule. Ka jingthmu ban tei ïa ka Meghalaya House ruh ka la don ha ki jingmut jong ka Sorkar, hynrei ban ïaleh ban pynbiang kyrkieh shwa ïa ki samla pule namar bun kiba leit pule ki shem jingeh ban ïoh ïa ki jaka sah bad ka dor ruh ka long kaba rem bha. Lada ngi tei ïa ka Meghalaya House ngin donkam ban thaw shuh shuh ïa ki kam bad buh ruh ïa ki ophisar”, u la ong.
Haba kylli halor ka jinglut, u la ïathuh ba ïa ka dor yn sa buh da ka Sorkar Karnataka, hynrei na ka liang ka Sorkar ka la mang ba ka jingpynlut ban thied ïa ka ïing mala kan long kumba T.20 klur.
