Shillong, Lber 26
Ka Prof. Sherwin M. Sungoh, kaba la shah thung kum ka Pro Vice-Chancellor ka North-Eastern Hill University (NEHU) ha u bnai Naiwieng 2024, ka la shimti pura ïa ka kam ha ka 21 tarik u Lber, 2025, kum ka jubab halor ki jingbthah ka tnad pule-puthi ka Sorkar India, bad ki jingkyrpad na ki ophisar ka Sorkar Jylla.
Ka kyrwoh na ka Prof. Sungoh ka ong ba ha kaba sdang, ka la kiar ban shimti ïa ka kam namar ka kynrum-kynram ha ka skulbah bad kum ka jingïatylli bad ki samla pule kiba don hapdeng ka jingshah thngan.
“Hynrei ha ka jingbym don u Vice-Chancellor (VC), u Prof. P.S. Shukla na ka jaka treikam naduh ka 3 tarik u Lber, 2025, ka jingtreikam jong ka skulbah ka la shah ktah, khamtam ha ka liang ka pule-puthi, pisa-tyngka, bad ka jingpynïaid kam. Katba ki jingtreikam ba man ka sngi ki la bteng hapoh ka jingpynïaid kaba paka jong ki ‘Statutory Officer’, kiba bun ki rai ba kongsan ki dang sahteng,” ka la ong.
Kumta, namar ka jingdonkam ban wanrah biang ïa ka jingskhem bad jingshaniah kumjuh ban pyntikna ba ka lawei jong ki samla ha ka jingpule kan ym shah ktah, ka tnad pule-puthi ka Sorkar Pdeng ka la kynjoh ïa ka Prof. Sungoh ha ka 20 bad 21 tarik u Lber, 2025, da kaba kyntu ïa ka ban shimti ïa ka kam na ka bynta ka jingmyntoi jong ka skulbah. Hadien ka jingïakren bad ki heh ophisar ka Sorkar Jylla, kiba la ban jur ruh halor ka jingdonkam jong ka jinglong nongïalam jong ka ha kum kane ka por kaba eh, ka Prof. Sungoh ka la rai ban shimti noh kum ka Pro Vice-Chancellor bad ka la pyntip ruh sha ka tnad.
Katkum ki kyndon jong ka University Statute (Statute 2A(5)(i)), ka Prof. Sungoh ka la pynpaw ba ha ka jingbym don jong u VC na Headquarter, kan pyndep ïa ki kam jong ka ophis Vice-Chancellor tad haduh ba u Prof. Shukla un shimti biang ïa ki kam jong u.
Kum ka Pro Vice-Chancellor ba rangbah tam jong ka skulbah, la pynkup bor pura ha ka ban treikam kum ka VC hapoh kine ki jinglong-jingman.
Ka Prof. Sungoh ka la pynpaw ka jingsngewnguh ïa ka tnad pule-puthi ka Sorkar Pdeng, ka Sorkar Jylla, bad ïa u MP ha Lok Sabha na ka Jylla halor ka jingsngewkhia jong ki ha kaba ïadei bad ka jingeh kaba dang ïai bteng ha NEHU. Ha kajuh ka por, ka la ai khublei ïa ka jingtreilang jong ki nonghikai ba rangbah bad heh ophisar, kynthup ïa u Prof. Saha (u Professor ba rangbah tam), u Prof. S. Umdor (In-Charge Controller of Examinations and Finance Officer), bad B. Rynjah (In-Charge Registrar), kiba la trei khlem shongthait ban pyntikna ïa ki jingtreikam jong ka skulbah ha kine ki 5 bnai ba la dep.
Shuh shuh ka Prof. Sungoh ka la khot la wer ïa baroh ki nongshim bynta jong ka NEHU ban ïawan lang bad ban kner ïa ka jingïatreilang ha ka ban pynskhem ïa ka skulbah.
Nalor kane, ka la ban biang halor ka jingkut jingmut jong ka ban buh hakhmat eh ïa ka bha ka miat jong ki samla pule bad ka jingman bha baroh kawei jong ka shlem jingpule ha kane ka por kaba eh.
