Shillong, Lber 26
Ka Kynhun Myntri jong ka Sorkar MDA-II ka la mynjur ban thaw ïa ka Meghalaya Social Welfare Recruitment Board (MSWRB) da ka jingthmu ban pynkloi ka jingpyndap ïa ki kam kiba lait hapoh kane ka tnat.
Haba kren bad ki lad pathai khubor ha ka Sngi Balang, u Myntri ba khmih ïa ka tnat Social Welfare uba dei ruh u Nongaiktien ka Sorkar, Bah Paul Lyngdoh u la ong ba katei ka mat ka dei kaba la donkam kyrkieh ban thung kam noh ha ki kam kiba lait thylli khnang ba yn lah ban shim khia ïa ka jingduna ki nongtrei ha ka tnat. U la ong ruh ba kane ka rai ka long ban pynkloi noh ïa ki kam ba ïadei bad ka jingpynrung kam ha ki kam kiba lait bad ka Kynhun Myntri ka la ai ka jingmynjur ban thaw ïa ka Meghalaya Social Welfare Recruitment Board.
U Bah Paul Lyngdoh u la ong ba la bynshet ha ka Board ïa ka jingkitkhlieh ha kaba ïadei bad ka jingthung kam, khamtam ka jingdonkam kyrkieh ban shim khia ïa ka jingduna ki nongtrei da kaba thungkam noh mardor.
“Ngi la ïakren ïa ka jingduna ki nongtrei, bad ngi la lap ba don shibun ki kam ba lait ha ki kyrdan bapher-bapher kum ka kam Lady Supervisor bad ka kam Child Development Project Officer (CDPO). Ki don 62 tylli ki kam Lady Supervisor ba dang donkam ban pyndap, 8 tylli ki kam CDPO”, la ong u Myntri.
U la ong ba kane ka jingthung kam ka la shim por ban ïa kaba la khmih lynti ka dei na ka jingpynslem da ka MPSC.
Katkum ka jingïathuh u Myntri ïa ka Meghalaya Social Welfare Recruitment Board yn khlieh da ka Chairperson kaba dei ka kyrdan Commissioner & Secretary ha ka tnat Social Welfare jong ka Sorkar Meghalaya, katba ka Director kum ka Member Secretary.
