Shillong, Lber 26
Ka Kong Grace Mary Kharpuri kaba dei ka MDC ka NPP na Nongshken kaba shong ha ka liang pyrshah ka la ïeng ban pynshai halor ka jingbuh jingkylli u MDC ka UDP na Shella konstitwensi, Bah Barikupar Synrem uba shong lang ha liang pyrshah ha dorbar ka Khasi Hills Autonomous District Council (KHADC) halor ka jingkylli ba u la buh balei ba ki bym dei Khasi ki ïoh ban thep vote ha ka ilekshon Wahadadar ka Shella Confederacy.
Kane ka jingbuh jingkylli u MDC ka UDP na Shella, Bah Barikupar Synrem ka dei hadien ba u CEM ka KHADC Bah Shemborlang Rynjah u la wanrah ïa ka kaiphod halor ka ilekshon jied ïa u Wahadadar ha Shella Confederacy kaba la long ha ka Sngi Balang ha sngi sdang ka dorbar mang tyngka.
U Bah Barikupar u la pynpaw ka jinglyngngoh ba don ki bym dei Khasi kiba la ïoh ban thep vote ha kane ka ilekshon jied Wahadadar, kumta u pan jingshai la ka don ne em ban khanglad ïa kine ki briew ban nym ïoh thep vote ha ki por ban sa wan.
U la pyntip ruh ba u la ïoh ka jingujor na ki katto katne ki nongshong shnong kiba dei hok ki khlem mih kyrteng wat kiba haïing jong u ruh kim mih kyrteng kaba long kumba pynduh ïa ka hok ka jong ki.
Na ka liang u Bah Shemborlang u la jubab ba ïa kaei kaba u MDC na Shella u kwah jingshai, ka EC kan sa peit bniah bha ïa ki briew kiba nabar ynda la wan biang ka ilekshon. Hadien ba la dep kren u CEM, ka Kong Grace Mary Kharpuri ka la ïeng ban pynshai da kaba ong ban nym ïalam bakla ïa ka ïing baroh kawei namar u MDC ka Shella um tip bha da kaba ong, “Ngan kren ïa ka jingshisha namar ka ilekshon jied Wahadadar nga don ka Executive Committee kaba la dep ha kato ka por shwa ban pynlong ilekshon la dep weng lut ïa ki kyrteng bym dei Khasi”.
