Shillong, Lber 26
Na ka jingïoh khubor ba ki bar jylla kiba shong ba sah Pyntha-Umdan, Elaka Mawlong, kaba la ju tip baroh shi katta kum ka Ichamati bad kumjuh kiba dei na shabar katei ka jaka kum na Shillong, ba ki don jingthmu ban pynlong ïa ka rally ne ka jingïaid paidbah ha ka 27 tarik u Lber, 2025, ban rakhe kynmaw burom ïa ki ar ngut kiba la ïap ha u snem ba la dep, ka Khasi Students’ Union (KSU) Mawlong Unit ka la leit ban wad jingtip na ki bor pynïaid ka Elaka kata na u Sirdar ha kaba la ïoh jubab ba kam shym la don jingai jingbit ïa ki bar jylla ban pynlong ïa kum katei ka rally ha Pyntha-Umdan.
Kum ban shu kdew ba ha ka janmiet 27 tarik u Lber, 2024, ka la jia ka jingshah bom ïap jong ar ngut ki bar jylla ha Pyntha-Umdan ha ki ‘riew shim kabu kaba la jia ruh hadien ka jingïalang thang kot kyndon Citizenship Amend-ment Act, 2019 ba la khot pynlong da ka Khasi Students’ Union (KSU) South Khasi Hills District ha khmat motdur jong u Bah Lurshai Hynñiewta, u dkhot ka seng uba la shah shoh pynïap ha ka 28 tarik u Rymphang, 2020.
Ïa ka Post Mortem jong kitei ar ngut ba la tip kyrteng kum u Esan Sing bad u Sujit Dutta, la pyndep ha Civil Hospital, Shillong ha ka 28 tarik u Lber, 2024. Ki bahaïing jong kine ar ngut ki la ïathuh ba ka jingjia shah bom pynïap ka la jia ha ka por ba ki wan bylla thep maw ha ki par maw kiba don ha katei ka shnong.
La ong ba katba ki dang ïaid lynti la don ki kali kiba ïaid bad mar ïa ïohi ïa ki la don kiba hiar na kitei ki kali kiba la bom bad shoh ïa ki haduh ba kin da ïap.
Ha kaba ïadei bad ka jingwan ïakren ka KSU Mawlong Unit, ka KSU South Khasi Hills District ruh lyngba u Bah Reebokstar Diengdoh, President ka la phah ïa ka kyrwoh ba lada ki bar jylla ne ki bahaïing ki pynlong lehniam ne puja ha la ïing ban kynmaw burom ïa kiba la ïap kan nym lei-lei hynrei ban don kiba kynshoit ban ong ba pynlong da ka rally shabar ïing kumta ruh ka seng kan nym sngewtynnat satia.
Katkum ki khubor, la ong ba ki bor pynïaid ka Sohra Civil Sub-Division ki la shim ïa ka sienjam ban nym don ka jingthut ha ka shong suk shong shngaiñ ha katei ka bynta kata da kaba pynkhlaiñ ïa ki bor pahara.
La ong ruh ba ki bor pynïaid ka Sub-Division ki la don jingïakren bad ki bahaïing jong kitei kiba khlad bad kyntu ba kim dei ban pynlong jingkynmaw burom ïa kitei kiba la ïap da kaba mih shabar ïing ne sha surok hynrei dei ban lehniam ha la ïing.
