Shillong, Lber 26
U Nongaiktien ka Sorkar MDA-II uba dei ruh u Myntri ba khmih ïa ka tnat Social Welfare, Bah Paul Lyngdoh u la ong ba ka Sorkar kan shim khia lada ka ïohpdiang ïa ka jingujor ba don ki kynhun kiba ïalam ïa ki khynnah shabar ka Jylla.
Kane ka jingkren u Myntri ka long haba kylli halor ka jingdawa ban tohkit ïa ki briew kiba ïalam ïa ki khynnah ban leit skul shabar ka Jylla, kaba don jingïadei bad ka jingjia ïa ki khynnah skul ba leit pule sha Karnataka.
Haba kren bad ki lad pathai khubor ha ka Sngi Balang, u Bah Paul Lyngdoh u la kubur ba don ki kynhun kiba ïalam ïa ki khynnah, hynrei u la pynpaw pat ba halor ka jingjia ïa ki khynnah ha Karnataka ym shym la don ba ujor satia.
“Ngi donkam ban ïoh da ka jingujor namar ka lah ban don ka jingai jingbit jong ki kmie ki kpa ne ki ba haïing-hasem, ïa kaba ka Sorkar ka don ka bynta ka ba rit tam ba ka lah ban leh, hynrei lada ki don ki jingujor kiba long thikna ba ki khynnah ki shah ban beiñ tang ban pynkylla niam, ngin shim khia bha ïa kita ki jingujor. Kumta ngi donkam ban ïoh ïa ki jingujor kiba thikna”, u la ong.
U Myntri u la kyntu ïa baroh kiba don ka jingsngewkhia, khamtam ki nongïalam shnong ha ki thaiñ nongkyndong ba ki dei ban ai jingtip sha ka Sorkar Jylla bad na ka liang ka Sorkar bad ka tnat Social Welfare kan ïoh ban shim khia ïa baroh ki jingujor.
“Ka long kaba kongsan ïa baroh ha ka imlang sahlang ba kin ai jingtip sha ngi, bad mynta kam pat don eiei kaba kum kata. Tang kane ka jingjia kaba mynta ha kaba arngut ki khynnah shynrang ki la khlad noh, na kata ka daw ka la mih ka jingsngewkhia, bad lada ym dei na kane ka jingjia ym don ba tip ba la leit buh ïa ki khynnah ha kita ki jaka sah”, la ban jur u Myntri.
Haba kren shuh-shuh ïa ki sienjam ba ka Sorkar ka la leh halor katei ka jingjia, u Bah Paul u la ong ba ka Sorkar ka buh thong ban pynthikna ka jingshngaiñ ïa baroh ki nongshong shnong ka Jylla kiba leit pule shabar, bad dei na kata ka daw ba la phah ïa u Commissioner & Secretary ka tnat Home Political ba un leit hi dalade ban leit peit ïa ki khynnah kiba shah sumar, hadien ba la khlad noh 2 ngut na ka jingïoh ïa ka bam ba la long bih.
U la ong ba na ka liang jong ka Sorkar kan leh lut baroh kiba dei ban leh khnang ban lap ïa ka jingshisha halor ka jingkhlad noh jong arngut ki khynnah ha Karnataka.
“U Commissioner & Secretary un sa aiti ïa ka kaiphot sha u Symbud Myntri Rangbah ba khmih ïa ka tnat Kam Pohïing bad sha u Myntri Rangbah bad ngin sa shim ïa ka rai”, la ong u Bah Paul.
