Shillong, Lber 26
Ka Khasi Jaiñtia Presbyterian Assembly (KJPA) Music Gospel Concert bad Food Fest ïa kaba la ai kyrteng kum ‘Hosanna 2025’ kan sa long ha ka sngi Saitjaiñ jong ka 29 tarik u Lber 2025, ha Madan Student Jaïaw.
Ha kane ka sngi, ka Food Fest kan sdang naduh ka por 11 baje mynstep bad ka Concert pat kan sdang naduh ka por 4 baje janmiet.
Haba kren sha ki lad pathai khubor ha ka Sngi Balang ka 26 tarik u Lber, 2025 ha Shillong Press Club, u Rev. S Diengngan, Convener, Fund Raising Committee Foreign Mission Board KJPA, u la ong ba ka jingthmu jong kane ka Free Music Concert ka long kum shibynta ban ai ka jingkyrshan bad pyntyllun ïa ki kam Mission shabar ri jong ka KJP Assembly.
U Rev. Diengngan u la ong ba ha kane ka Gospel Concert, kin don ki nongrwai bad nongtem kiba kynthup ïa ka Aroha Choir ba la ïalam da ka Kong Pauline Warjri, Ka MANE Music Ministry, Ka Sur na Nongkyndong-Lynshing, Kong Kyntiewlin Mawphniang bad u Bah Batlador Khongnoh & ki paralok bad yn pynsuhsieng ruh ha katei ka sngi da ki jingrwai jong ki Standing Choir jong saw tylli ki Synod, kita, ka Synod Mihngi, Synod Sepngi, Synod Pdeng bad Ri-Bhoi Synod.
Kaba kham kyrpang ha kane ka kynti, ka long ka jingdon ryngkat jong u nongïalap bad nongrwai niam uba la paw bha, u Benny Prasad bad ka kurim jong u, ka Zan Benny na Bengaluru. U Benny Prasad u dei tang ma u ba lah ban poi lut sha baroh ki ri ka pyrthei ban leit ïalap ïa ka khubor babha lyngba ka sap tem sap put bad ka jingphla shem mynsiem ïa ka jingieit U Blei.
U Rev. Diengngan u la pyntip ruh ba ha katei ka sngi, u Myntri ka Sorkar Jylla uba bat ïa ka tnat Social Welfare, Bah Paul Lyngdoh un long kum u kongsan bad u Bah Renikton L Tongkhar uba dei MLA un long kum u Symbud kongsan ha ryngkat ki nongshah khot sngewbha naduh ki nongkitkam jong ki Synod.
