Shillong, Lber 27
Ka Sorkar Jylla ka la pynpaw ba kan bha ban thaw noh ïa ka Task Force ban khmih ïa ki mat ba ïadei bad ki nongri syiar ha ka Jylla.
Ha ka Sngi Palei, ki dkhot bad nongïalam ka Meghalaya Poultry Farmers and Welfare Association (MPFWA) ka la ïakynduh ïa u Myntri ba khmih ïa ka tnat Animal Husbandry & Veterinary, Bah A.L Hek ban ïathir na ka bynta ban tehlakam halor ka jingwanrah ïa ki syiar nabar Jylla khnang ban ïada na ka jingïabit jingpang.
Haba kren sha ki lad pathai khubor hadien ba la ïakynduh ïa ki nongri syiar, u Bah Hek u la ong ba ka la don ka jingai jingmut ban thaw noh da ka Task Force, bad ïa kane ka Task Force yn thaw da ka tnat Veterinary jong ka Sorkar, ha kaba u la pyntip ba ki nongri syiar ki la ai jingmut ban thung dkhot lang napdeng ki nongri syiar.
“Kino-kino ki jingeh ba ki mad ki dei ban wanrah sha ka jingtip jong ka Task Force,” u la ong. Na ka liang u Myntri u la ïathuh ba u la pyntip ha ka kynhun ki nongri bad khaïi syiar ba ïa mynta kam don kano-kano ka jingpang ha ki syiar lane ka ‘bird flu’, ha kaba u la ong ba kaei kaba ki dkhot ka MPFWA ki kren ka dei kaba ki la kdew ïa kaei kaba la jia ha u snem 2019-2020 ha Haryana bad kam dei satia kaba la jia dang shen.
“Lada ka dei kaba jia dang shen ngin ïoh ïa ki jingtip kum ka Sorkar bad ka tnat kan ym shu sngap, ngin shim khia mar-mar ïa katei ka jingpang kaba jia shabar jong ka Jylla Meghalaya,” la ong u Bah Hek.
Na ka liang u Bah William Diengdoh uba dei u dkhot ka MPFWA u la ong, ba ka seng ka la pynpaw ïa ka jingsngewkhia namar ka jingwanrah ïa ki syiar kiba nabar ka Jylla, khamtam na ki jaka kiba la pynbna ba ki syiar ki dei kiba la ïoh ïa ka jingpang ‘bird flu’.
Katkum ka jingïathuh u Bah Diengdoh, la lap ba don kawei ka kali kaba wanrah ïa ki syiar na ka Jylla Haryana, Punjab kaba dei ka Jylla ba la dep pynbna ba don ka jingpang, bad ïa kitei ki syiar la lap noh mardor bad ym shym la shah ïa ki ban pynrung shapoh ka Jylla Meghalaya.
“Ngi la wan sha ka Sorkar ban dawa ba ïa mynta shipor khang noh shwa ka jingwanrah ïa ki syiar na shabar ka Jylla, hynrei ngi sngewthuh ba kane kan ym lah ban treikam bad ka Sorkar ka la pyrkhat ban buh noh da ka Task Force ban ïada na ka khlam jingpang kaba wan na sha kiwei ki jaka ban shngaiñ ki nongri jingri bad ki nongbam ïa ka doh syiar”, u la ong.
U la ong ba ka Task Force kan khmih ruh ïa ki jingeh ki nongri jingri bad ban pynthikna ban jurip bniah katkum ki kyndon ka ban long katkum ka National Action Plan ka Sorkar Pdeng.
U la ong shisien ba la pyntreikam ïa ki kyndon ba la don lypa ki briew kiba wanrah ïa ki syiar na shabar ka Jylla kin ïoh ban bud ryntih, kum ki kyndon ka Motors Vehicle Act, ka Prevention of Cruelty to Animals Act bad ka Transportation of Livestock Rules, bad bynrap ba lada la pyntreikam ïa kine ka don ka jingkyrmen ba yn lah ban tehlakam.
U Bah Diengdoh u la ïathuh ba ka kynhun ka la aiti ruh ruh ïa ka thup jong ki jaka kiba lah ban wanrah sop-sop ïa ki syiar na shabar Jylla, bad pynpaw ba tang na ka surok lyngba ka Byrnihat, kan ym lah ban tehlakam namar ba don kiwei ki jaka kiba ju wanrah ruh kum na thain Umsiang, Jirang, Mawlasnai bad kiwei ki jaka.
