Shillong, Lber 27
Ka jingjur jong ka dheng kali ha ki bynta ka thaiñ Motphran ka la long kaba shyrkhei bha jan man la ka sngi ha kaba ka la don ruh ka jingud-jingnam na kiba bun ki paidbah kiba ju shong kali ban leit sha la ki kam-ki jam.
Ha ka jingïoh ban ïakren bad u President ka Motphran Auto Rickshaw Owner’s & Driver’s Association (MARODA), u Bah Evandul Marbaniang, u la ong ba na ka liang ka kynhun ha ryngkat ka jingïatreilang bad ka Dorbar Shnong Mawkhar, ka la buh da uwei u khynnah ban ïarap ha ka ban pynïaid ïa ki kali ha kitei ki bynta ka Motphran bad ong ba na ka liang utei u khynnah ruh u la pyrshang ban leh ïa la ka kamram.
U Bah Evandul u la ong, ka Motphran kam dei ka jaka ban pynïeng kali hapdeng surok hynrei ka dei tang ban shu pynhiar ïa ki nongshong kali bad ban ïaid noh khnang ba kan nym pynsahkut pat ïa ki kali kiba bud nadien bad kaba wanrah pat ïa ka jingdheng kali.
U la ong ba na ka liang ka Association ka la trei lang ryngkat bad ka Dorbar Shnong Umsohsun, Mission Compound bad Mawkhar ban ïaleh katba lah ban weng ïa katei ka jingdheng kali ha kitei ki bynta da kaba kyrpad ruh ïa ki taksi ba kin shu pynhiar ïa ki nongshong kali bad ba kin ïaid noh khnang kan nym don than kata ka jingeh haba ïadei bad ka jingdheng kali.
“Da ka jingsngewkhia mynsiem ngan hap ban kren ïa ka jingshisha ba lada ki taksi ki shu pynhiar ïa ki nongshong kali bad lada ki ïaid noh kan nym don than kata ka jingeh”, ong u Bah Evandul.
Shuh-shuh, u Bah Evandul u la ong ba wat na ka liang u MLA ka North Shillong ruh, Bah Adelbert Nongrum uba la trei shitom bad shimkhia bha katba lah ban weng ïa katei ka jingdheng kali bad ha kajuh ka por uba la rah ïa katei ka mat hapoh ka Shiphew Dorbar kaba la long hapoh Jaïaw Pdeng ban ïakren bad ïathir halor katei ka bynta.
“Ngi la ïatai bha bad ka Shiphew Dorbar kaba kynthup lang ïa kane ka bynta kaba dei jong ka Umsohsun, Mission Compound, Mawkhar, Wahthapbru, Wahingdoh, Riatsamthiah ïa ka bynta kaba donkam bha”, ong u Bah Evandul.
