Shillong, Lber 27
U Myntri ba khmih ïa ka tnat Bording ha ka Jylla, Abu Taher Mondal u la ong ba lada ki paidbah ki shem ba ka bai thang bording ilektrik ka kiew shaba palat pud ne ki don kano-kano ka jingeh, ki dei ban pyntip sha ki bor ba dei peit ba kin leh ïa kaba donkam.
“Ha ka jingshisha ngi la pynshai bunsien ba lada don kano-kano ka jingjia bad haba don ka jingkiew ka bai thang bording, dei ban wanrah sha ka jingtip jong ki bor ba dei khmih bad ngin sa peit ïa kiba kum kita”, la ong u Mondal haba jubab halor ka jingkiew palat pud ka bai thang bording.
U la ong ruh ba ki don ki khep ba pynlong ban kiew ka bai thang bording, ha kaba ki don ki briew ki siew duna ha ki bnai kiba la dep bad ka bai thang bording ka neh beit kumjuh ha ki meter, bad hadien ba leit peit da ki nongtrei jong ka tnat la lah ban pynbeit.
“Ngi kyrpad ïa ki nongthang bording ba lada don kum kita ki jingjia, sngewbha pyntip sha ki bor ba dei khmih kiba hajan eh”, u la ong.
Lah ban kdew ba na ka por sha ka por ka la don ka jingud na ki paidbah halor ka jingkiew palat pud ka bai thang bording ilektrik, bad dang ha ki khyndiat sngi ba la dep ki don ki shnong na ka thaiñ West Khasi Hills kiba la ïoh ïa ka bill bai thang bording kaba palat shilak tyngka, kaba la pynlong ïa ki paidbah ban leit tur sha ka shlem jong ka MeECL ban pan jingshai.
