Shillong, Lber 27
“Nga la kyndit haba ka Voice of the People Party (VPP) ka la jop bun ngut ha kane ka ilekshon MDC haduh ba kan synshar marwei ïa ka Khasi Hills Autonomous District Council (KHADC) bad ki MDC barim kiba dang wanphai biang ki don sa tang saw ngut,” la ong u Nongïalam ka Liang Pyrshah, Bah Titosstarwell Chyne uba dei u MDC ka UDP na Sohra Konstitwensi.
Kane ka jingpynpaw kaba sngewkyndit jong u Bah Titos ka dei haba u wanrah ïa ka mat jingïakren haba dang ïaid ka dorbar mang tyngka kaba la long ha ka Sngi Palei ka 27 tarik Lber, 2025 halor kumno ban weng ïa ka kyrduh kam kyrduh jam jong ki samla ha kane ka juk kaba mynta.
U Bah Titos u la ïathuh haba u la wad na kaei ka daw ba ka VPP ka jop bun ha kane ka ilekshon, u la lap ba ka dei ka mat jingkular ne ka ‘manifesto’ jong kane ka seng ha ka por ilekshon kaba la khring ïa ki samla namar ha ka laiñ kaba khatduh la thoh ba lada ka wan ha ka bor ha ka KHADC yn plie lad ïa ki samla ban seng kam lajong.
Kumta u khmih ba ka EC kaba mynta kaba la ïalam da ka VPP kan mang pisa kham bun na bynta ban seng kam lajong ha ka mang tyngka kaba pura ka ban sa long ha ki bnai ban wan.
Ïa kane ka mat ban ïakren la shimbynta lang da u MDC shimet na Laban Mawprem Bah Ricky Shullai.
Haba jubab ïa kane ka mat jingïakren ba la wanrah da u Bah Titos, u CEM Bah Shemborlang u la ong ki samla ki leit pule tang ïa ki sobjek kaba pule paidbah hynrei ki duna pat kiba leit pyntbit kyrpang ban pule, kumta u la ong ba ka donkam ïa ka Sorkar ka dei ban wanrah da ka rukom treikam kaba thymmai ha ka pule puthi khnang ban plie lad ïa ki samla ha ka ïoh kam ïoh jam.
Ha kawei pat ka jingwanrah ïa ka mat ban ïakren (motion) u Bah Titos Chyne u la ong ba kumno ka Executive Committee ba la ïalam da ka VPP kan leh haba ki nongtih maw tih shyiap kiba rit kim ïoh lad shuh ban kamai jakpoh naduh ba ka Sorkar Meghalaya ka la pyntreikam ïa ka Meghalaya Minor Mineral Concession Rule 2016.
Kane ka mat ban ïakren ka dei halor ka jingeh jong ki nongtih maw tih shyiap kiba rit hapoh ka Khasi Hills Autonomous District Council kiba la ïakynduh jingeh ha ka kamai kajih jong ki.
U Bah Titos u la ong, lada leit sha Sohïong, Mawkynrew, Pynursla yn ïohi ki longkmie ki bah ïa ki khun ki shoh maw harud surok bad ban lum ïa u mawria shi ‘trailer’ ne shi pick-up ban die ban kamai jakpoh.
U la ong ka jingdonkam mawria bad shyiap kam dei tang ka jingdonkam teng teng hynrei ka dei kaba man ka sngi ban shna ïing shna sem bad ïa kiba trei bylla100 sngi ruh bad ki kam pynroi ha shnong ki donkam.
Shuh shuh u la ong ba ka Sorkar ka la leh la ka jong ka kamram bad ka KHADC ruh ka dei ban leh la ka jong ka bynta kaba khraw ban weng ïa ka jingeh jong ki nongtih maw tih shyiap kiba rit.
Na ka liang u CEM Bah Shemborlang u la kular ba wat la ka KHADC kam dei ka bynta hynrei u sngewkhia ban shim lang ka jingïatreilang baroh ka ïing ne ban leit sha Sorkar ban ïakren ban ai jingmut ban plie lad plie lynti biang ïa ki nongtih maw tih shyiap.
