Mairang, Lber 27
Ka District Magistrate (DM) ka Eastern West Khasi Hills District katkum ka section ba 163 BNSS, 2023 ka la mana bad khang ïa ka jingtih shyiap harud wah bad sawdong jong ka jingkieng Umthied Bynther lyngba ka shnong Lyngdohmaram khlem ka jingïoh jingmynjur na ka Ministry of Environment & Forests, ka Sorkar Kmie lane na ka State/District Environmental Impact Assessment Authority.
Katkum ka kyrwoh khubor na ka District Magistrate, la ong ba ïa kane ka hukum la pynmih ha ka 24 tarik u Lber 2025 kaba long katkum katei ka section.
Shuh shuh, ka khubor ka ong ruh ba ka District Magistrate ka la pynmih ïa kane ka hukum hadien ba la ïoh jingujor halor ka jingdon jong ki briew kiba tih shyiap beaiñ khlem laisen bad ka long ruh ba pynkheiñ ïa ka aiñ National Green Tribunal (NGT) kaba la pynmih ha ka 5 tarik Nailar 2013 bad da kaba pyndonkam ruh ïa ki kor ki bor ban pynkhuid ïa u shyiap ba la dep tih bad namar ba kane ka jingleh ka long beaiñ bad ka buh jingma ïa ki dohum dohwah ha ki wahduid bad wahbah ha kitei ki jaka.
Ka District Magistrate ka la ong ruh ba kane ka hukum ka la trei kam naduh u 24 tarik Lber 2025 bad lada lap ïa kino-kino kiba pynkheiñ ïa kane ka hukum kin shah pynshitom katkum ka kyndon aiñ 223 jong ka BNS, 2023.
