Shillong, Lber 27
Ka dorbar jong ka Khasi Hills Autonomous District Council (KHADC) ka la sdang ban khluit shipor haba u MDC ka HSPDP na Mawshynrut Konstitwensi Bah Srally Rashir u la ong ba u Executive Member (EM) ne u MDC um dei ban pynïaid ïa ka dorbar da kaba pyni ïa ki kyndon ne ki aiñ hynrei ka dei ka kamram jong u Shong-knor ban kdew haba don jingduna.
Kane ka jingkren u Bah Srally Rashir ka dei hadien ba u Bah Pynkhawboklin Kharjahrin uba dei u Executive Member u la ïeng ban knieh ktien katba dang ïaid ka kynta kylli jingkylli kaba la long ha ka Sngi Palei ha ka dorbar mang tyngka kaba la ïaid ar sngi da kaba ong ‘point of order’ ba uno-uno u dkhot um lah shuh ban kylli palat lai tylli ki jingkylli bynrap.
Kane ka jingknieh ktien u Bah Pyn-khrawboklin ka long hadien ba u MDC ka UDP na Mairang Bah EL Nongrang u dang buh tang ar tylli ki jingkylli bynrap haba u kwah jingshai na u Chief Executive Member Bah Shemborlang Rynjah haba ïadei bad ka jingkylli kaba u la buh ba katno tylli ki ïew ïadie ïathied masi ki don hapoh ka jingpeit ka Khasi Hills Autonomous District Council kaba u CEM u la jubab ki don haduh hynñiew tylli.
Kane ka jingïeng ban kren sa u Bah Srally Rashir ka long namar ba um sngewïahap ba u Bah Pynkhrawboklin haba u dei u EM un knieh ktien haba u MDC na Mairang u dang buh tang ar tylli ki jingkylli.
U Bah Srally u la ong ba ka don hok ne em ban pyni aiñ da u Executive Member, hynrei ka dei ka kamram u shongknor ban pyni haba u kren ne um kren, hynrei ban pynïaid da u EM ïa ka dorbar ka long lehnohei ban jied shongknor.
Ha kawei ka jingkylli, ka Executive Member ba dei peit ïa ka tnat pule puthi ka Kong Aibandaplin F Lyngdoh ka la ïathuh ba ka jingmang pisa ban ai jingïarap sha ki Lower Primary jong u snem 2024-25 ka long haduh 25 lak tyngka hynrei haduh mynta ka jingpynlut ïa ka pisa ka long haduh 12 lak 24 hajar tyngka.
Kane ka jingjubab ka Kong Aibandaplin ka dei halor ka jingkylli bynrap ba la wanrah da ka MDC ka NPP na Nongpoh Konstitwensi ka Kong Rona Khymdeit ha ki kynta kylli jingkylli kaba la long ha ka Sngi Palei.
Ka Kong Rona ka la ong hadien ba ka la pule bniah ïa ka mang tyngka jong ka Vote on Account ha ka Grant kaba hynñiew kam shym la don eiei ban pynmang pisa ïa ki Primary School namar ka la pynkynmaw ba ha u snem 2014-2019 ka Executive Committee ka ju mang pisa haduh 36 hajar tyngka ban ai sha ki Lower Primary school ki bym pat ju ïoh jingïarap na ka Sorkar.
Na ka liang ka Kong Aibandaplin ka la ong biang ba ka Executive Committee kan sa peit ïa ka mang tyngka kaba pura.
Ha kawei pat ka jingkylli, u Executive Member ka KHADC u Bah Winston Tony Lyngdoh u la ïathuh ba ki don haduh 16 tylli ki Toll Gate ne ki jaka lum khajna bad ki don 7 tylli ki ban kut ha une u bnai Lber 2025.
U la ïathuh ba ïa ki jaka lum khajna kiba la dep kut kiba la dep pynthymmai, ka EC kan sa shong ban pyrkhat biang bad kan sa shong pyrkhat ruh ïa kine ki ban sa kut mynta u bnai Lber 2025.
U Bah Winston u la jubab ïa kane ha ki kynta kylli jingkylli ba la buh jingkylli da u MDC ka Rambrai Jyrngam Konstitwensi u Bah L Kharbani.
Haba bynrap ïa ka jubab jong kiwei ki MDC, u Bah Winston u la ïathuh ba kine ki toll gate ka jingïoh lum pisa ka long haduh 26 lak 25 hajar tyngka jong u snem 2024-25.
Shuh shuh u Bah Winston Tony Lyngdoh u la ïathuh ba ki don 4 tylli ki ‘check gate’ ne ki khyrdop talasi ban peit bniah ïa ki kali kit mar beaiñ bad na kine 2 tylli ki don hapoh East Khasi Hills District bad 2 tylli hapoh Ri-Bhoi District.
Ïa kane u la jubab haba buh jingkylli u MDC ka Rambrai Jyrngam u Bah L Kharbani.
U Bah L Kharbani u la ong ba u sngew lyngngoh haba u ïoh ïa ki jingujor na ki paidbah ba nalor kine 4 tylli ki dang don shuh ki check gate kiba u la ïoh jingtip ba la buh ha ki jaka bym dei ban buh ruh. Hynrei u Bah Winston u la ong ba na ka liang ka EC kam shym ïoh jingtip halor kane.
U Bah L Kharbani u la ong ba ka jingdon jong kine ki Check gate ki bym ithuh na ka District Council kan ktah ïa ka pla tyngka ka KHADC.
Kumta u la kyrpad ïa ka EC kaba la ïalam da ka VPP ba kan shimkhia ïa kane ban leit khmih hi ïa kitei ki jaka bad na ka liang u Bah Winston u la ong ba ka EC kan sa leh ïa kaba donkam.
