Shillong, Lber 28
Ka Voice of the People Party (VPP) ha ka Sngi Thohdieng ka la sospon ïa u MLA ka North-Shillong, Bah Adelbert Nongrum na bynta 3 snem namar ki kam pyrshah seng jong u.
Ïa kane ka rai la shim hadien ba ka seng lyngba ka State Executive Committee (SEC) ka la khmih bniah ïa ki jubab jong u MLA hadien ba la pan jingshai na u ha ka 1 tarik u Lber.
“La ïohi ba ka jubab jong phi, ha ka jaka ban pynpaw ïa ka jingsngewsih ne ban pdiang ïa ki jingsngewkhia ba la pynsngew – ka long kaba ïada, kaba ïaleh pyrshah, bad kam don kano-kano ka dak jong ka jingsngewsih na bynta ki kam kiba la shim ba ki long kiba buh jingma ïa ka jingbit jingbiang jong ka seng,”ong u Vice-President ka VPP, Dr. Kara H. Shen ha ka shithi sospon ba la phah sha u Bah Nongrum.
U la ong ruh ba ka sienjam kaba u MLA u la shim ha ka ban jubab ïa ka jingpan jingshai ka pyni shuh-shuh ïa ka jingbym kohnguh ïa ka aiñ bad ki nongrim jong ka seng, bad ïa kane ym lah ban shu iehnoh kumto.
“Hadien ba la pyrkhat sani bha, ka seng ka shem ba ka jingbatai jong phi kam long kaba sngewhun bad, ha kaba pyndonkam ïa ka bor katkum ka Article III, Clause 5 jong ka Riti Synshar jong ka VPP, la sospon noh ïa phi na ka seng na ka bynta 3 snem bad kane kan treikam noh mardor,” u la ong.
Ka seng ka la kdew ruh ba ha kane por hapdeng ka jingshah sospon, u MLA un ym ïoh shuh ban bat ïa kano-kano ka kyrdan, ka jingkitkhlieh, ne ki hok long dkhot hapoh ka seng.
Ha kajuh ka por, la khang ïa u ban mihkhmat ïa ka seng ha kano-kano ka jingïalang ne rynsan paidbah.
“La kyntu ïa phi ban kiar na kino-kino ki kam kiba lah ban nang pynsniew shuh-shuh ïa ka seng,” ong ka kyrwoh na u Dr. Shen.
Nalor kane, ka seng ka la sospon ruh ïa 4 ngut kiwei pat ki dkhot jong ka namar ki kam pyrshah seng jong ki.
Kitei 4 ngut kiwei pat ki kynthup ïa u Bah Snarbor Laloo, Imti Jamir, Bah Wilstone Sohshang bad Bah Richinbusiness Marweiñ.
Hashuwa, u President bad MLA ka Voice of the People Party (VPP), Bah Ardent M. Basaïawmoit u la kren shai ba ka seng kan sa shim ïa ka rai halor ka bynta ba ïadei bad u MLA ka North-Shillong, Bah Adelbert Nongrum.
“Ym tang ki nongïalam hapoh ka seng, hynrei ïa kane la ïohi da ki paidbah hi kum ki kam pyrshah seng bad ka seng kan sa shim ïa ka rai halor kane,” ong u Bah Basaïawmoit haba jubab la ka seng ka la shim ne em kano-kano ka rai ne shim ïa ki jingleh u Bah Adelbert Nongrum kum ki kam pyrshah seng.
Haba kylli kiei ki sienjam kiba ka seng kan shim haba ïadei bad kane ka bynta, u la ong, “Ka seng kan sa shim ïa ka rai…ngin sa ïathuh sha phi ha ka por kaba biang.”
Kum ban shu kdew hangne, shi bnai tam mynshwa kawei ka durkhih ka la saphriang ha ki rynsan lad pathai ha kaba u MLA ka VPP na North-Shillong, Bah Adelbert Nongrum, u la kren shaphang ka seng ha ryngkat ka jingdonlang jong kiwei de ki ‘riew rangbah.
