Shillong, Lber 28
U Myntri Rangbah ka Assam, Himanta Biswa Sarma, u la ong ba lada ki Sorkar Jylla ki ïatreilang hapoh ka jingïalam ka Sorkar Pdeng ban bteng ka jingkthong bad ban ñion ïa ki nongkhaïi drok, yn sa lah ban jop ïa ka thma pyrshah ïa u drok.
Haba kren bad ki lad pathai khubor ha ka Sngi Thoh -dieng, u Himanta u la ban jur ïa ka jingdonkam ba ka Jylla Meghalaya bad Assam kin ïatreilang hapoh ka jingïalam ka Sorkar Pdeng ban rat dyngkhong ïa u drok na ka thaiñ baroh kawei.
“Ki Jylla lada ki ïatreilang hapoh ka jingïalam jong ka Sorkar Pdeng kan long kaba bha ïa ngi, hynrei lada ngi ki ar Jylla ngin shu ïatreilang khlem da pyndonbynta lang ïa ka Sorkar Pdeng, kan ym long kaba bha”, u la ong.
U la ong ba ka kam khaïi drok ka dei kaba la ktah bha bad ki don bun jait ki rukom treikam jong ki nongkhaïi drok, ha kaba u la pynpaw ba lada ka don ka jingïatreilang ban ïakhun ïa ki nongkhaïi drok, yn sa ïoh ïa ka jingjop ha ka thma pyrshah ïa u drok.
Haba kylli, u Myntri Rangbah ka Assam u la pynpaw ba katkum ka jingsngew jong u, baroh ki Sorkar Jylla ki la leh eiei, bad pyrshang ban leh kaba bha tam ha kaba ïakhun ïa u drok.
“Kane ka dei ka kam kaba khraw, namar ki nongkhaïi drok ki ïasylla bun jait bad ki pyndonkam bun ki buit treikam. Nga tharai lada ngi ïatreilang bad bteng ka jingkthong bad ban ñion ïa ki nongkhaïi ngin sa jop ïa ka thma drok, baroh ki Jylla ki la trei tyngeh bad ngi donkam shuh-shuh ruh ban dang trei kham tyngeh”, la ong u Himanta.
Halor ka jingbym ïoh ban kem ïa ki snar khaïi (Kingpin) kiba pynïaid ïa ka kam khaïi drok, u Myntri Rangbah ka Assam u la ong ba ki snar khaïi drok kim don satia hangne, hynrei ki treikam na sha shiliang pud,
“Ki lah ban ym don ha India ruh, ki pynpoi ïa u drok lyngba ki mynnong (agent), bad teng-teng kine ki mynnong ki wanrah shibun bad don ki por ruh ba ki wanrah tang khyndiat bha, ba ngim lah ban ïoh bat. Ki tbit bha ban suhbuit bad ki lah ban shim ïa u drok ha kaba ïaid ruh. Ki pulit ki hap ban trei kham tbit ban ïa ki”, u la ong.
Haba pynpaw ba kane ka jingïakhun kam long kaba suk, u Himanta u la ong ba wat ka ri America mynta ka ïakren kumno ban ïakhun ïa ki kynhun khaïi drok. U la ong ba ïa kane ka thma pyrshah ïa ki nongkhaïi drok baroh shipyrthei ka ïakhun ym tang ka Meghalaya bad ka Assam, u la ong ruh ba ka dei ka kam khaïi kaba heh bah bad don bun kiei-kiei ba rieh sha lyndet.
