Nongstoiñ, Lber 30
Ka seng HNYM West Khasi Hills ha ka Sngi Thohdieng jong ka taïew ka la leit ban ïakynduh biang ïa u Executive Engineer ka tnad MePDCL Nongstoiñ Division ban ïakren halor ka jingbym pat shai jong ki paidbah kiba la ïoh ïa ka jingthoh na ka tnad ba dei peit ban siew ïa ka bai bording.
U Bah Tailan Lyngkhoi, President ka HNYM West Khasi Hills haba kren ha ki lad pathai khubor hadien katei ka jingleit ïakynduh, u la ong ka jingleit ban ïakynduh biang jong ka seng ka long kumba ki paidbah ki la ïoh ïa ka shithi na ka tnad ba dei peit, kaba la don ka jingsngew bad jingbym hun jong ki paidbah.
U la ong ruh ba na ka liang ka seng ka la ïai buddien na kawei ka sngi sha kawei pat ha kaba ïadei bad kane ka kam, bad ha kane ka sngi ka la ïoh ban ïakren bad ïatai sani bad u EE ka tnad MePDCL Nongstoiñ ha kaba na ka liang jong u, u la pan por ba la kumno-kumno artaïew khnang ba ka ophis kan ïoh ban khmih bad pynbeit.
“Ka seng ka kyntu ïa ki paidbah ban ïaishah ba hapoh kine artaïew lehse yn ïoh ïa ka jingpynshai lane ka jingpynbeit na ka ophis,” u la ong.
U la ïathuh ruh ba u EE ka tnad MePDCL u la kyrpad ba lada don kino-kino ki paidbah kiba kwah ban ïoh jingshai lane kiba kwah ban phah kheiñ bha ïa ki ‘bill’ kaba ki, ki la ïoh ïa ka jingthoh ki lah ban leit ïakynduh ïa u lane ïa u SDO hapoh ka ophis khnang ba kin ïoh ban ïa peit ba naduh mynno la shah ot ïa ka bording bad katno ka pisa kaba la pynsah naduh kata ka por ba la phah ot noh ïa ka bording.
U la ong ruh ba ïa mynta, artaïew yn ïaishah bad lada ka ophis kam lah ban leh eiei, na ka liang ka seng kan ïaid shakhmat lada ka dei ban hap ïa mih paidbah ban ïakhih.
U la ong ruh ba ka jingleit ïakynduh ïa u EE ka tnad MePDCL ka long ruh ba ka seng ka dang ïoh shuh-shuh ïa ki jingujor na ki paidbah ha kaba ki don katto-katne ki paidbah kiba la phah ïa ka jingujor sha ka seng. Kawei kaba kham sngewlyngngoh shuh shuh ka long ba ïa kawei ka longïing kaba la kyrteng Aibiang Lyngkhoi na ka shnong Phudumbah, ka dei kaba pyndonkam ïa ka bording kaba duk lane BPL, kata naduh u snem 1998 ka la pyndonkam bad ka la shah ot noh ha u snem 2013. Katkum ka jingkheiñ kane ka longïing ka la pyndonkam ïa ka bording 15 snem tad haduh ban da shah ot noh bad haba kheiñ ïa ka ‘bill light’ jong kane ka longïing ka la shong dor 800 shi bnai ïa kaba kane ka longïing ka lah ban pyndonkam bad baroh ka ‘bill’ jong kane ka longïing ka la kot haduh T.15,7984/-.
Haba ïakren pat bad u Executive Engineer, West Khasi Hills MePDCL Nongstoiñ Division, u la ong ba ka don ka skhim OTS , bad kane ka skhim ka long ba kin ai ïa kito kiba la shah ot ïa ka bording la kham slem kaba don 5kw hapoh kaba dei tang ia ki DLT bad BPL , bad ka jingthmu ka long tang ban sngewthuh noh ïa ka pisa kaba dang sah bad ka ophis, bad lada ki la siew kan map noh ïa ka sut bad yn kheiñ tang ïa kaba ki la thang ha kato ka por bad la ailad ban siew ‘installment’.
Shuh shuh u la ong ruh ba ka jingai ïa ki shithi ka long khnang ban pynsuk ïa ki paidbah ba kin ïoh jingmyntoi, hynrei ym dei ba pynbor ïa ki ba kin siew ne kim siew namar ki la ïoh ïa katei ka skhim.
