Babu Kular Khongjirem
Haba pyrkhat shaphang ka jingmaïan u Khasi Hyndai, ka long shisha ka jingsarong, ka jingphuh mut phuh mat ba u Hyndai u da buh nongrim kaba skhem halor ka jaidbynriew jong ngi. Ka jaidbynriew Khasi ka dei ka jaidbynriew ba la jied hok shisha da u Trai Nongbuh Nongthaw.
Ha u Lum Sohpetbneng, ha u Khasi, ka dei ka pharshi halor ka jingtieng rasong ïa ka Hok ha kaba u Hynñiew ha tbian bad u Khyndai na jrong ki dang ïa kiew ïa hiar na kata ka jingkieng ksiar mynba dang kynthong ka pyrthei. Nangta pat, sa wan tyllup sa ka Diengiei, kaba pharshi ïa ka jingtyllup ka pap ka sang, ka jingwan mih u laiphew ksuid laiphew khrei bad sa mih sa ki thaw-ar, ka thaw bynriew ka buh bynriew, ka raibi bad ka tyrut ka smer, etc. Dei ynda la wan u Khraw jutang na krem ‘lamet na krem ‘latang ba u Khasi u sa nang ban buh sa ïa ka kheiñ ka bishar bad ka kñia ka khriam.
Hyndai, u Khasi u lah ban ïakren thik thik bad la u Trai Nongbuh Nongthaw. Lada U Blei u lah ban pynpaw ïalade halor u Lum Sinai, hato, kam lah mo ban long ba U Blei U la pynpaw ïalade, ha u Khasi, halor u Lum Sohpetbneng ne halor u Lum Shyllong? Ka jingkyntang ka Wah Jordan kam shym la ïapher bad ka jingkyntang ki Khyndai Umdih ki Khyndai Umtong. Lehse, u Diengsning Khasi u kham kyntang pynban ban ïa u dieng Kedar. Ka ‘Lamet ka ‘Latang bad u ‘lasier lehse, ki kham kyntang pynban ban ïa ki Diengtlai. U khun Khasi u sa ïakren pat bad U Trai Kynrad lyngba ki dak ki shin ha ka dur jong Kem – ka Lar, lyngba ka Liengshat ka liengkhein. U bishar ruh ha ki san, ki hynñiew ne khyndai dkhot ne ha u rwieng jong u Khraw Jutang, ne ha kiwei pat ki dak ki shin jong ka Kheiñ ka Bishar hakhmat U Nongthaw U Nongbuh. Namarkata, kam dei satia kaba suk ban shu ïa kheiñkai khieñ dewthala ïa ka sap ka phong bad jingmaian stad Blei u Khasi Hyndai.
