Shillong, Lber 30
Ka jingkhynñiuh u jumai ha Myanmar ka la pynjulor ïa ki jingtei ïingmala, ki jingkieng bad ki lad pynïasoh kiba kongsan ha Mandalay ha ka taïew ba la dep – kaba la pynthut shi kat dei ïa ka kam jong ki nongïarap ban poi sha kito kiba dang sahkut hapoh ki jingtwa maw bad ban ai jingïarap ïa kito kiba la lait im na kane ka jinglynshop mariang.
Namar ka jingduna ki tiar jingdon-jingem bad ki lad pynïasoh kiba la dkut noh, ki nongïarap kim banse ban pynkhuid ïa ki jingtwa maw da ki kti da ka jingkyrmen ban lap ïano-ïano kiba dang im.
Ka jingdon jong kiba la khlad noh haduh mynta ka long 1700 ngut. Ki khubor ki ong ruh ba ki don kumba 3,400 ngut kiba la mynsaw bad palat 300 ngut kiba dang jah rngai.
Ka jingkhie u jumai uba don ïa ka jingkhlaiñ kaba 7.7 ‘magnitude’ ka la lynshop ïa ka Myanmar ha ka Sngi Thohdieng bad ka jaka jong ka jingsdang ka dei hajan Mandalay, kaba la ïalam sha ka jingkhyllem jong ki bun tylli ki jingtei ïingmala bad pynjulor ïa kiwei pat ki jingtei kum ka kad liengsuiñ jong ka nongbah.
Kumba ka long, la khmih lynti ba ka jingïap kan nang kiew namar kiba bun na kito kiba sahkut bad shah tap shapoh ki jingtwa maw kim pat ïoh jingïarap haduh mynta.
Ka AP ka ïathuh ba ka la don ruh ka jingsma jong ki met ïap kiba la pyut ha ka lyer jong katei ka nongbah kaba wan ba-ar haba phai sha ka jingheh.
Ïa ka kam pyllait im la sdang nyngkong eh da ki nongshong shnong khlem kano-kano ka jingïarap jong ki tiar kiba heh. Ki la pynkynriah ïa ki jingtwa maw da ki kti bad da ki belsha hapdeng ka jingshit kyrang kaba 41 C.
Kito kiba la lait im na ka jingkhynñiuh jumai ki la sah miet ha ki surok. Ki ïingsah jong kiba bun ki la shah pynjulor lut; kiwei pat ki dang sheptieng palat ban leit phai sha la ki ïing ki sem da ka jingkhmih lynti ïoh ba khie biang u jumai hadien.
Ka Cara Bragg, Manager jong ka Catholic Relief Services kaba don ha Yangon, ka la ong ba ki Hospital ki ïakynduh jingeh ha ka jingduna ki nongtrei bad ki tiar sumar.
“Kaba hakhmat eh dei ki nongtrei mon sngewbha bad ki briew na ka thaiñ kiba dang pyrshang ban wad ïa kiba ieid jong ki. Nga la ïohi ruh ïa ki khubor ba mynta ki don ki ri kiba la phah ïa ki kynhun ban wad bad leit pyllait im shaduh Mandalay ban kyrshan ïa ki jingpyrshang jong ki, hynrei ki ‘Hospital’ ki ïakynduh jingeh haba ïadei bad ka jingwan tuid jong ki briew kiba mynsaw – ka don ka jingduna jong ki tiar sumar bad ki briew ki ïaleh katba lah ka ban wad ïa ka bam bad ka um kaba khuid,” ka la ong.
Da ka jingshah pynjulor jong ka kad liengsuiñ Mandalay bad ka jingkhyllem jong ka ‘Control Tower ha ka kad liengsuiñ jong ka nongbah Naypitaw, baroh ki liengsuiñ kit briew sha ki nongbah ki la shah khang.
Shuh shuh ki jingïarap nabar ri ki la sdang ban wan. Ar tylli ki liengsuiñ C-17 ka India ki la wan hiar ha ka janmiet Sngi Saitjaiñ ha Naypitaw ha ryngkat ka kynhun ‘Field Hospital’ bad kumba 120 ngut ki briew, kiba nangne pat ki dei ban leit shaphang Shathei sha Mandalay ban pynïeng ïa ka jaka sumar kyrkieh kaba don 60 tylli ki jingthiah. Ka kynhun jong 17 tylli ki trok kit mar jong ka China kiba kit ïa ki jaka sah ba kongsan bad ki tiar sumar la khmih lynti ba kin wan poi sha Mandalay.
