Shillong, Lber 30
Ka jingpynkyntang ïa u Fr. Bernard Laloo kum u ‘Auxiliary Bishop’ jong ka Jylla Niambah Shillong ka la long ha Calvary, Cathedral of Mary Help of Christian, Laitumkhrah, Shillong ha ka Sngi U Blei.
Ïa ka jinglehniam la pynbynta da u Archbishop ka Jylla Niambah Shillong, u Most Rev. Victor Lyngdoh, ha ryngkat ka jingsakhi lang jong ki bahaïing bahasem u Fr. Bernard, u Myntri Rangbah ka Jylla, Conrad K. Sangma, u Symbud Myntri Rangbah, Bah Prestone Tynsong, ki Myntri ka Sorkar Jylla, ki MLA, ki MDC bad kiwei-kiwei.
Hadien ka liturji na ka jingpule jong ka Jingthoh Bakhuid, la khot la jer ïa u Fr. Bernard ban pynithuh ïalade, bud sa ka jingkhot kyrpad ha u Mynsiem Bakhuid bad hadien kane, bud sa ka jingpule ïa ka shithi ba la thung ‘Auxiliary Bishop’ ïa u Fr. Bernard ba la phah da u Pope Francis bad la pule ïa ka shithi ha ka ktien Latin da u Most Rev. Leopoldo Girelli bad ha ka ktien Khasi la pule da u Vicar General jong ka Jylla Niambah Shillong, u Rev. Fr. Richard M. Majaw.
U Archbishop Victor Lyngdoh haba ai ïa ka sneng ka kraw da kaba pynshong nongrim na ka Jingthoh Bakhuid kaba la sot na ka Gospel u Lukas 15:3, 11-32, ha shuwa ban pynkyntang ïa u Fr. Bernard, u la ong, “Ngi dei ban long kum u kpa jong u khun sarong awria, uba kloi ban pdiang ban map bad ban ieid ïa kiba la leh bakla ne leh pop ha ka jingim jong ki.”
“Ko Bishop Bernard to long kum u kpa jong kato ka pharshi ba ngi dang shu dep pule ha ka Gospel, to long uba kloi ban long kpa ïa ki khun jong ka Balang,” u la ong.
Hadien ka sneng ka kraw, la bud sa ka riti lehniam pynkyntang Bishop da ka jingkylli-tohkit ïa u Fr. Bernard bad la pynbud pat sa ka jingduwai da ka sur jingrwai kaba pan ïa ka jingïasaid jong ki ‘riewkhuid bad hadien kane, ki Bishop bad ki Archbishop ki la buh ïa la ki kti halor u Fr. Bernard ban duwai kyrpad ïa u Blei na bynta jong u.
U Archbishop u la pynbud pat sa ka jingduwai pynkyntang da kaba pan bor na u Mynsiem Bakhuid bad ka jinghiar pateng ha ka Balang la kyntang Bishop ïa u Fr. Bernard Laloo da kaba pynsleh da ka umphniang Krisma.
Hadien kane, la aiti ha u Bishop bathymmai ïa ka Gospel kum ka jingkitkhlieh jong u ban ïalap ïa ka Ktien U Blei bad ban hikai ïa ki paid ‘riewngeit, ka sati, ka tupia, u diengduh nar bad u Diengphna.
Haba kut noh jong kane ka jinglehniam, ka la don pat sa ka jingleh burom ïa u Bishop Bernard Laloo bad ka jingpynkup burom ïa u Apostolic Nuncio, ïa ki Bishop bad ki Archbishop kynthup ruh ïa u Myntri Rangbah bad Symbud Myntri Rangbah ka Jylla.
Ha kane ka jingpynkyntang ‘Auxiliary Bishop’ ïa u Fr. Bernard Laloo la sakhi lang da u Apostolic Nuncio jong ka Vatican sha ri India bad Nepal, u Most Rev. Leopoldo Girelli ryngkat ka jingdon lang jong ki Bishop, ki Archbishop na ki Jylla Niam ka Thaiñ Shatei Lam Mihngi, ki Phadar, ki ‘riewniam bad hajar ngut ki paid ‘riewngeit jong ka Balang Katholik.
