Shillong, Nailar 17
Ka Khasi Student’s Union (KSU) Shillong Mihngi Circle ha ka lah sngi u Blei ka la leit ban jurip ïa ki dukan kiba don ha 4th Furlong bad ban wad ïa ki briew kiba sait ïa ki tiar ha ka Wahumkhrah.
Ha kane ka jingjurip ka KSU la ïadonlang ryngkat ki ophisar na ki tnad sorkar bapher-bapher kynthup ki pulit ka tnad Excise, ka tnad Meghalaya Urban Development Authority (MUDA), ka tnad Food Safety, ka tnad Municipal bad na ka tnad Labour.
Ïa kane ka jingkhynra la pynlong hadien ba la saphriang kawei ka durkhih ha ki rynsan paidbah (Social Media) ba arngut ki bar Jylla ki la sait ïa ki khiew ki pliang ha ka Wahumkhrah.
Na ka jingwad ïa ki briew ba sait tiar ha ka Wahumkhrah, ka KSU ryngkat ki bor pulit ka tnad Excise ki la lap ïa kawei ka kudam kaba buh kynton ïa ki kyiad be-aiñ bad la ïoh ban kurup haduh 94.9 litar ka kyiad IFML, 183.8 litar ka beer bad 2.6 litar ka Wine.
Haba kren sha ki lad pathai khubor u President ka KSU Shillong Mihngi Circle u Samla Banjop Dkhar u la ïathuh ba ha kane ka jingkhynra la lap ba kane ka jaka ka long kaba jaboh bha kum ka jingbret pathar ïa ki jaboh ha ka Wahumkhrah, ka jingpyntuid ïa ki umjaboh, kumjuh kaba la lap ruh shapoh jong kane ka jaka bam kaba la lehsih haduh ba la isaitmet ban ong ba ka dei ka jaka bam.
Katkum ka jingïathuh u Samla Banjop, ki arngut kiba sait tiar ha Wahumkhrah ki la leit ban pyndem hi hapoh ki pulit ka Pasteur Beat House, Polo. “Kane ka jaka ka la long kum ka ktem kaba ishyrkhei bha ha nongbah Shillong” u la ong. U la ong ba ka KSU kan sa phah da ka jingthoh sha baroh ki tnad ba dei khmih ba ki dei ban shimkhia bad ka la phah ruh ïa ka kyrwoh sha ka Sorkar ba lada ïa ki jingtei be-aiñ ha kane ka jaka kam leh eiei, ka KSU kan sa shim ïa ki sienjam kiba kham tyngeh nangne shakhmat.
U Samla Samuel Kharbani Secretary KSU Shillong Mihngi Circle haba bynrap u la ong ba kane ka jingjurip ka long kum ka jingpynkynmaw ïa ki tnad Sorkar ba kin pyndep hok ïa ka kamram jong ki ban peit ban khmih ïa ka long ka man kumjuh ba kin pynthikna ïa ka jingshngaiñ jong ki paidbah.
Ka KSU ka la phah ka kyrwoh kaba shai sha ka Sorkar ba lada kam lah ban leh eiei ïa ki jingtei be-aiñ bad ki jingleh bymsuidniew kitei ki dukan ka seng kan sa shim da kiwei ki sienjam nangne shakhmat ka KSU kan sa shim hi ïa la ka kamram.
