Shillong, Nailar 07
U nongïalam ba rangbah ka BJP bad u MLA ka Pynthorumkhrah, u Bah Alexander Laloo Hek u la ong ba ka seng ka la sngewthuh ba ka jingbym lah jong ka ban jop ïa palat 2 tylli ki ‘seat’ sha ka Ïingdorbar Thawaiñ ka Jylla ka dei ka mat kaba jwat bad ka dang shim ïa ki sienjam ban pynbeit ïa kane.
Ha kajuh ka por, u Bah Hek u la kyntait ban jer kyrteng ïa ki nongthaw aiñ ba mynta bad kito ki barim kiba angnud ban ïasoh sha ka BJP hashuwa jong u snem 2028, da kaba kdew ïa ka jinglong-jingman kaba kylla jong ka saiñ pyrthei na ka por sha ka por.
Haba kren sha ki nongthoh khubor ha ka Lah Sngi U Blei, u Bah Hek u la ong ba ka BJP ka la pynlong ïa ka jingwad bniah ban sngewthuh ïa ki jingduna jong ka seng haba phai sha ki kam ilekshon.
“Ngi la leh ruh bun tylli ki kam wad bniah. Ka dei ka jinglong-jingman kaba jwat bad kan shim por shibun ban batai. Hynrei mynta ngi la sngewthuh ïa kane ka jingeh bad ngin sa pynbeit ïa ka, kawei hadien kawei, katba ngi lah ban poi,” u la ong.
Halor ka jingrung dkhot thymmai, u Bah Hek u la pynpaw ba katto-katne ngut ki nongïalam ba paw ki don ka jingangnud ban pynïasoh sha ka BJP hynrei u la ong ba ka dang kloi eh ban pynpaw kyrteng.
“Ki kyrteng kiba paw, ngim pat kwah ban pynmih mynta. Ngim kwah ban jer kyrteng ïa ki namar ha ka saiñ pyrthei, katba phi lah ban buhrieh, ka kham bha ïa ka seng,” u la pynpaw.
Haba kylli shuh-shuh, u la ong, “Bun ki kyrteng kiba paw ki kwah ban pynïasoh sha ka seng, hynrei ngin ym ai kyrteng sha phi mynta namarba ka dei ka kam ka bym long ban pynpaw. Ngim lah ban ïathuh ïa phi, namarba kin don shibun ki jingeh kiba lah ban mih lada ngi leh kumta. Ka ilekshon ka dang sah sa shisnem shiteng, kumta hynriew bnai hashuwa ka por, phin sa ïohi ba baroh kan sa beit ryntih.”
U la pyntikna ba ki MLA ba mynta bad ki barim kumjuh ki long napdeng kito kiba dang ïakren bad ka seng.
“Ngan ïathuh ïa phi, ki nongthaw aiñ kiba mynta ruh ki don, bad ki MLA barim ruh ki don. Hynrei ngan ym jer kyrteng ïano-ïano ruh mynta. Ka dang kloi palat ban jer kyrteng ïa ki namarba ka saiñ pyrthei ka lah ban kylla wat tang shi miet ruh, kumta ngim kwah ban pynpaw ïa ka kyrteng jongno-jongno ïa mynta,” bynrap biang u Bah Hek.
Une u nongthaw aiñ uba la jop la hynriew sien u la khot la wer ruh ïa ka jingïashim bynta ba shitrhem na ka liang ki samla.
“Ka la dei ka por ba ki samla kin ïadon bynta ha ka saiñ pyrthei. Ngi donkam ïa ka pateng bathymmai ban don ha ka saiñ pyrthei. Katba ïalade, nga la shakri la palat 30 snem ha ka saiñ pyrthei, kumta ngi dei ban ai jaka ruh ïa ki samla jong ngi ban ïadon bynta ha ka saiñ pyrthei”, u la ong.
“Ban ïasoh bad ka BJP, ka shong ha ka jingstad jong ki, kano-kano ka seng kaba ki kwah ban ïasoh. Hynrei ki samla ki dei ban mih shakhmat ban ïadon bynta ha ka saiñ pyrthei,” la ong u Bah Hek.
