Shillong, Nailar 17
Ka ophis Commissionerate of Food Safety ka la leit ban phah khang khyrdep ïa kawei ka dukan bam kaba la tip kum ka Kozy Bar & Restaurant kaba don ha 4th Furlong bad ka la pynsangeh shipor ïa ka laisen jong katei ka dukan.
Kane ka jingphah ban khang ïa katei ka dukan ka dei hadien ba ka tnad ka lap ïa ka jinglehsih haba ïadei ka bam ka dih kumjuh ba kam don satia ka jinglehkhuid leh suba hapoh jong katei ka jaka bam.
Haba kren sha ki nongthoh khubor ka Deputy Commissioner of Food Safety ka Kong D.B.S. Mukhim, ka la ong ba ïa kane ka dukan la phah khang shwa shipor bad ka tnad kan sa ai ïa ka kaiphod sha baroh ki tnad ba dei ban khmih ban bishar ïa kane bad kiwei ki bynta jong kane ka dukan.
Ka Kong Mukhim ka la ïathuh ba na ka por sha ka por ka ju pynlong ïa ka jingjurip ban peit bniah ïa ka khuid ka suba jong ki dukan bam ha ka thaiñ bad dang shen ruh ka tnad ka dang wan ban jurip ïa ka Kozy Bar & Restaurant bad ka long kaba bit ba biang. “Kane ka jingleh bym kheiñ briew ka la long shaba palat, ka la long ka jingpynkheiñ ïa ka aiñ jong ka Schedule ba 4 jong ka Food Safety” ka la ong.
Ka Kong Mukhim ka la maham tyngeh ïa ki nongdie marbam mardih, ki dukan bam, ki restaurant, ki bar, ki hotel ba ki dei ban shimkhia haba ïadei ka jingkhuid jingsuba ba kan long ka jingshngaiñ ïa ki paidbah nongbam, ka la ïathuh ruh ba ka tnad nangne shakhmat ka dang ïaibteng ban peitngor ïa ka khuid ka suba jong ki dukan bam bad lada lap ïa kiba lehsih bad pynkheiñ ïa ki kyndon kan ym map hynrei kan khang khyrdep syndon ha ryngkat ka jingdaiñ kuna.
“Ka tnad nangne shakhmat kan ym map shuh lada lap ïa kiba pynkheiñ ïa ki kyndon namar na ka por sha ka por ba ka lap ka dang ailad ïa ki, hynrei nangne shakhmat kan ym ailad shuh” ka la ong.
