Shillong, Nailar 17
U Myntri Rangbah ka Jylla Conrad K Sangma ha ka sngi Nyngkong u la ong ba ki surok ki don ïa ka bynta ban wanrah ïa ka jingkylla kaba plie lad ïa ka jingkiew shakhmat jong ki district ba sha jaka kyndong, haba buh ïa u mawnongrim ban shna pynheh ïa ka surok Weiloi-Mawkyrwat-Rangthong ha South West Khasi Hills.
Ka projek ba T.140 klur, bala bei pura na ka pla pisa ka Jylla, ka dei u mawmer jong ka jingpyrshang ka Sorkar ban pynïar ïa ki lad pynïasoh bad pynthikna ba ka roi ka par ka poi shabar ka Shillong sha ki jaka ba kyndong eh jong ka Jylla.
U Symbud Myntri Rangbah Bah Prestone Tynsong, Myntri kam Jngohkai Timothy D Shira, MLA Bah Renikton Lyngdoh, Pius Marwein, Olan Sing Suin bad Dr. Celestine Lyngdoh, kila ïadonlang ha kane ka jingïalang.
Haba ai jingkren ha ka jingïalang, u Myntri Rangbah u la ban jur ba ki jingkynshew pisa ha ki jingtei haba kut ki dei ki jingkynshew ha ki briew. “Man ka tyngka ba ngi theh ha ki lad pynïasoh kam dei kaba pynlut tang ha ka rong bad u maw. Ka dei ka jingkynshew ha ki briew – ba katno ka jingsuk ïa ki Kmie ba kin poi sha ki hospital, haduh katno u khynnah un lah ban poi skul thikna, bad katno ka jingsngewskhem u nongrep ban pynpoi mar sha ki ïew,” u la ong.
Haba kren halor ka jingphaikhmat jong ka Sorkar ban pynbiang tarajur ïa ka roi ka par ha man ki thaiñ, u la ban biang ba ka khana jong ka roi ka par ka Meghalaya ka dei ban kynthup ïa baroh ki district kiba don sha jngai. “Ka thong jong ngi ka long kaba shai -ym don ki thaiñ, ym don ki district ki ban shah ieh shadien. Ka roi ka par ka dei ban sdang na ki jaka ba kyndong eh bad poi sha man ki shnong ki thaw,” u la ong.
U Myntri Rangbah u la pynpaw ba ki district kiba la shah iehbeiñ bha baroh shikatta kum ka South West Khasi Hills, South Garo Hills bad East Jaiñtia Hills, kila don mynta hapdeng eh jong ki mat pynroi ka Sorkar. “Kaei kaba shisien ka por la kheiñ kum ki jaka kyndong bad la iehbeiñ, mynta kila kylla long ki jaka pynroi. Ka lynti treikam jong ngi ka long ban pynthikna ba ka roi ka par kan sdang na kine ki jaka,” u la bynrap.
Haba kren halor ka projek, u Myntri Rangbah u pyntip ba naduh u snem 2018, palat T.850 klur ki projek la pyntrei ha South West Khasi Hills, bad ki jingkular bala kheiñ lang kila poi mynta jan ïa ka T.990 klur.
Kine ki kynthup ïa ki surok, ki skhim pynpoi umbam umdih, ki jaka pule, ki jaka sumar bad ki kam pynroi ba ïadei bad ki kam jngohkai, kaba pyni ïa ka rukom treikam kaba bniah bad ba pynïoh bynta lang ha ka jingpynroi ïa ki district.
U la pynpaw ruh ba palat ïa ka 3200 km ka surok la dep ban shna ha kylleng ka Jylla Meghalaya ha kine ki phra snem bala leit noh-kaba long jan kumba 1 km ha ka shisngi-kaba pyni ïa ka jingkyntur ka bym pat ju jia mynno-mynno ruh ha ka lad pynïasoh.
“Kane ka surok Weiloi-Mawkyrwat-Rangthong kan plie ïa shibun ki lad ha ka kam jngohkai, ka rep ka riang, ka khaïi pateng, bad pule dangle. Ka lad pynïasoh ka dei u budlum kaba wanrah ïa baroh ki kam pynroi,” u la ong.
Kane ka projek kan kyntiew bhah ïa ka kam jngohkai ha South West Khasi Hills haba pynkhlain ruh ïa ki lad pynïasoh sha ki ïew ki hat ïa ki nongrep bad ki nongsengkam lajong.
