Shillong, Nailar 17
Ki nongtrei ka tnad Municipal ha ka step jong ka sngi Nyngkong jong ka taïew, ki la leit ban kyndang bad pynpra naphang ïa ki dukan ba la shna ha lynti ïaid kjat ha Laitum-khrah.
La sakhi ba ym shym la don shuh kiba die madan ha kane ka jaka, ha kaba la dep ban pynmih ka hukum ba ym shah shuh ban die jingdie ha kitei ki jaka. Ïa kine ki nongdie madan na Laitumkhrah ka Sorkar ka la dep ban pynshna bad pynkynriah noh ha Brightwell bad ha Dhanketi.
Ka jingleit ban pynpra noh ki nongtrei ka Municipal, kadei hadien ba ka Sorkar ka la dep ban pynbna ban nym shah shuh ban die jingdie ha kitei ki thaiñ.
Ha kane ka sngi, ym shym la don kano-kano ka jingpyrshah ne jingïakhih na ki nongdie madan, ha kaba ki nongtrei ka Municipal ki la kit lut ïa ki tiar ki tar bad pynpra ïa kiba la pynwit ïa ka lynti ïaid kjat ki paidbah.
Ha kane ka step la ïadon lang naduh ki nongïalam shnong ka Laitumkhrah, seng longkmie, ki ophisar ka Municipal, ki bor pulit, bad u CEO ka Municipal, u PK Boro bad kiwei.
Ka jingkyndang ïa ki dukan ba dangsah jong kiba die madan ha Laitumkhrah, kadei naduh Police Point, ter ter.
La ïohi ruh, ba la don ki nongdie madan kiba la wan lang ha kane ka step, hynrei kim shym la pyrshah bad ki la shu peitkai ïa ka jingpynpra ki nongtrei ka Municipal.
Ka jingsdang ban pynpra ïa ki dukan ba dangïeng ha shilynter ka surok ha Laitumkhrah, ka la sdang naduh ka por 9 baje mynstep, bad la sakhi ba ki nongtrei ka Municipal ki la pynpra lut ïa baroh ki dukan ba dang ïeng ha kitei ki thaiñ.
