Khliehriat, Nailar 17
Ki san tylli ki sengbhalang na rilum Jaiñtia ha ka sngi Nyngkong ka 17 tarik mynta u bnai kila pynlong ïa ka jingïakhih kaba kyndit-kyndit da kaba shong kyllain myngor kynsan hakhmat u mot dur jong u Woh Kiang Nangbah hajan ka ophis DC ha Khliehriat.
Kine ki sengbhalang ki kynthup ïa ka Jaiñtia National Council, Jaiñtia Student Union, Khasi Student Union, Hima Sutnga Youth Federation bad Federation of Khasi Jaiñtia and Garo people.
Kane ka jingïakhih ka long ban pyrshah jur ïa ka ‘public hearing’ jong ka Shree Cement Limited na ka bynta ban tih mawshun ha Lum Syrman hapoh Elaka Nongkhlieh kaba dang shu dep pynlong myn ha ka 31 tarik Naitung bad dawa na ka Sorkar Jylla ban pyndam noh shisyndon ïa katei ka ‘public hearing’ ka Shree Cement bad ban pynïoh shwa ïa ka hok ki trai jaka jong ka Elaka Sutnga bad Nongkhlieh bad ïa ki nongrep kiba dei trai ha u Lum Syrman.
Ha kane ka jingïakhih ki san tylli ki sengbhalang kila thang ruh ïa ki dur tyngshop jong u Myntri Rangbah ka Jylla Conrad K Sangma, ki arngut ki Symbud Myntri Rangbah kynthup u Bah Prestone Tynsong bad Bah Sniawbhalang Dhar nalor u MLA ka Khliehriat Bah Kyrmen Shylla bad MLA ka Sutnga Saipung Kong Santa Mary Shylla.
